Կառավարությունն առաջարկում է զորակոչի տարիքը դարձնել մինչև 28 տարեկան: Այս մասին այսօր ԱԺ-ում հայտարարեց ԿԳՄՍ նախարար Վահրամ Դումանյանը՝ ներկայացնելով համապատասխան նախագիծ և կոչ անելով պատգամավորներին կողմ քվեարկել: Նա հիշեցրեց, որ այժմ զորակոչի տարիքը սահմանված է մինչև 27 տարեկան է:
«Բազմաթիվ են դեպքերը, երբ 27 տարեկանը չլրացած սովորողներն ասպիրանտուրայի երկրորդ կուրսում զորակոչվում են բանակ: Սա բերում է արհեստական լուծումների: Ասպիրանտուրայի երկրորդ կուրսում սովորողները փորձում են ամեն կերպ պաշտպանել դիսերտացիան: Մենք առաջարկում ենք այդ տարիքը սահմանել 28, որով կլուծվի այդ խնդիրը և արհեստական լուծումների կարիք չի լինի»,- ասաց նա:
Այլ փոփոխություններ ևս նախատեսվում են․ «Այսուհետ բնագիտական, տեխնոլոգիական, ճարտարագիտական և մաթեմատիկական ուղղություններում Կառավարությանը տրվում է լիազորություն, ըստ որի՝ կսահմանվի բուհերի և մասնագիտությունների ցանկ, որտեղ կարող են ընդունվել մեր դիմորդներն ու ստանալ տարկետման իրավունք»,- ասաց նախարարը:
Նա նշեց, որ այդ իրավունքը կտրվի երեք մակարդակներում՝ բակալավրիատ, մագիստրատուրա և ասպիրանտուրա. «Նպատակն այն է, որ մեր բուհերի դռները բացվեն դիմորդների առջև՝ պետության համար որոշ կարևորագույն ուղղություններում որակյալ կադրեր ունենալու համար»:
Մանրամասները՝ տեսանյութում:
