Հայկական «Արդշինբանկը» հաստատել է HSBC Malta-ում 70% բաժնեմաս ձեռք բերելու նպատակով հայտ ներկայացնելու մասին տեղեկությունները՝ նշելով, որ «բավականին վստահ» է գործարքի հաջող ավարտի հնարավորության վրա։ Բանկը Times of Malta-ին տված հարցազրույցում է հաստատել հայտի դիմելու մասին տեղեկությունը:
«Ներկայումս հանդիսանում ենք HSBC Malta-ում 70% բաժնեմասի գնման հավակնորդներից մեկը։ Արդեն ներկայացրել ենք մեր առաջարկը»,- ասել է բանկի վարչության փոխնախագահ Դավիթ Սարգսյանը։
Նրա խոսքով՝ այժմ որոշումը HSBC Continental Europe-ինն է, որը մալթայական բանկի հիմնական բաժնետերն է։
Սարգսյանը վստահություն է հայտնել, որ «Արդշինբանկը» կդառնա նախընտրելի գնորդ՝ հիշեցնելով 2024 թվականի նոյեմբերին ավարտված HSBC Armenia-ի ձեռքբերման գործարքի մասին։ Նա հավելել է, որ բանկը վաղուց էր հետաքրքրված Մալթայով ու օգտվել է հնարավորությունից, երբ նախորդ տարվա սեպտեմբերին HSBC Malta-ն հայտարարել էր երկրից դուրս գալու ծրագրերի մասին։
Եթե գործարքը կայանա, սա կլինի ոչ միայն «Արդշինբանկի» առաջին քայլը Հայաստանի սահմաններից դուրս, այլև դրա մուտքը Եվրամիության շուկա։
«Արդշինբանկը» հանդիսանում է Հայաստանի խոշորագույն ֆինանսական կառույցներից մեկը՝ շուրջ 20% շուկայական մասնաբաժնով, ավելի քան 400 000 հաճախորդով և 2024-ին արձանագրած 338 մլն դոլար շահույթով։ HSBC Malta-ն ձեռք բերելու «Արդշինբանկի» մտադրության մասին լրատվամիջոցները հայտնել էին հուլիսի 14-ին։
