Չինաստանի ֆինանսների նախարարությունը հայտարարել է ապրիլի 10-ից ԱՄՆ-ից ներկրվող բոլոր ապրանքների համար լրացուցիչ մաքսատուրքերի սահմանման մասին՝ 34 տոկոսի չափով, հայտնում է Reuters-ը։
Որոշումն ընդունվել է ի պատասխան Վաշինգտոնի նմանատիպ միջոցառումների։ Չինաստանի Պետական խորհուրդը հայտարարել է, որ ԱՄՆ-ի քաղաքականությունը հակասում է միջազգային առևտրի կանոններին և «վախեցնելու միակողմանի գործելակերպ է»:
Ապրիլի 3-ին ԱՄՆ նախագահ Դոնալդ Թրամփը հայտարարել էր այլ երկրների, այդ թվում՝ Չինաստանի ապրանքների վրա մաքսատուրքերի սահմանման մասին՝ 34 տոկոսով։ Նրա խոսքով՝ դա կպաշտպանի ամերիկյան տնտեսությունը «անարդար» առևտրային պայմաններից։
Աշխարհի երկրների մեծ մասի, այդ թվում՝ Հայաստանի համար կիրառվել էր 10 տոկոս մաքսատուրք։ Ամերիկագետ Սուրեն Սարգսյանը պարզաբանել էր, որ դա կհանգեցնի հայկական ապրանքների գների բարձրացմանն ԱՄՆ շուկայում, ինչը կազդի դրանց մրցունակության վրա։ Նրա խոսքով՝ որոշ առանցքային ոլորտներ կարող են տուժել պահանջարկի նվազման պատճառով, մասնավորապես՝ ալյումինի, քարերի, թանկարժեք մետաղների, գյուղատնտեսական արտադրանքի և ալկոհոլի արտահանումը։
