Գերմանիայի նախագահ Ֆրանկ-Վալտեր Շտայնմայերի պատվիրակության՝ Հայաստան այցի ընթացքում Հայաստանն ու Գերմանիան ստորագրել են ֆինանսական համագործակցության համաձայնագիր, հայտնել է ՀՀ նախագահի աշխատակազմը։
Այն ստորագրվել է ՀՀ էկոնոմիկայի նախարար Գևորգ Պապոյանի և Հայաստանում Գերմանիայի դեսպան Կլաուդիա Բուշի կողմից։
Նախագահ Վահագն Խաչատուրյանի և Շտայնմայերի հանդիպման ընթացքում քննարկվել են երկու երկրների միջև բազմոլորտ համագործակցության ընդլայնմանն ու խորացմանը վերաբերող հարցերի լայն շրջանակ։
Կողմերն ընդգծել են ինչպես երկկողմ, այնպես էլ Եվրամիության շրջանակում փոխգործակցության առավել արդյունավետ կազմակերպման կարևորությունը՝ հատուկ ուշադրություն դարձնելով տնտեսական, կրթական, մշակութային և գիտական ոլորտներում հարաբերությունների խորացմանը, նշել են աշխատակազմից։
Ավելի վաղ Գերմանիայի նախագահը Ծիծեռնակաբերդի հուշահամալիրում հարգանքի տուրք էր մատուցել Հայոց ցեղասպանության զոհերի հիշատակին։ Ապրիլի 1-ին նա կմեկնի Ադրբեջան։
