Զանգեզուրի պղնձամոլիբդենային կոմբինատի ղեկավարությունն աշխատողների աշխատանքային պայմանները բարելավելու համար մի շարք փոփոխություններ կիրականացնի, հայտնել է կոմբինատը Ֆեյսբուքի իր էջում։
Ըստ հրապարակման՝ աշխատավարձերի վերանայման համակարգի մշակման աշխատանքների արդյունքում, որոնք սկսվել էին դեռևս 2024 թվականի սեպտեմբերին, աշխատավարձային ֆոնդը կավելանա միջինը 20%-ով։
«Ղեկավարությունը նոր աշխատավարձային համակարգը հիմնական արտադրամասերում կկիրառի արտադրության վերականգնումից մեկ ամսվա ընթացքում»,- նշված է հայտարարության մեջ։
Կոմբինատից հայտնել են, որ հաշվի առնելով բժշկական ապահովագրության վերաբերյալ ստացված բազմաթիվ գրավոր և բանավոր բողոքները՝ ԶՊՄԿ-ի ղեկավարությունը փետրվարի 17-ին կհայտարարի բաց մրցույթ` աշխատողների առողջության ապահովագրությամբ զբաղվող ընկերությանը փոխելու նպատակով։
«Կոմբինատը կընտրի նոր ապահովագրական ընկերություն, որը կապահովի աշխատակիցների պահանջներին համապատասխան որակյալ ծառայություններ»,- ասված է հայտարարությունում։
Ընկերությունից նաև հավաստիացրել են, որ վերջին տարիներին ԶՊՄԿ-ն իրականացնում էր առկա համակարգերի ու նախագծերի տեխնիկական աուդիտ, որն ավարտվել էր 2024 թվականի դեկտեմբերին։ Նշվում է, որ մեկնարկել է նոր համակարգերի նախագծման և ձեռքբերման գործընթացը։
«Ընկերությունը երաշխավորում է, որ ժամանակակից, բարձր արդյունավետությամբ օդափոխության և ասպիրացիայի համակարգերը կտեղակայվեն հիմնական արտադրամասերում ոչ ուշ, քան 2025 թվականի ավարտը»,- ասված է հայտարարության մեջ։
Հունվարի 31-ից ԶՊՄԿ-ի մի շարք աշխատակիցներ գործադուլի միջոցով պահանջում են աշխատավարձերի 50%-ով բարձրացում և վերադասի հետ բաց երկխոսության ապահովում: Փետրվարի 1-ին կոմբինատի մամուլի խոսնակ Արայիկ Մարգարյանն Armenia Today-ին ասել էր, որ հունվարից ուժի մեջ է մտել ընկերության կողմից աշխատավարձերի հավասարեցման համապատասխան որոշումը, ինչը դժգոհություն էր առաջացրել։ Փետրվարի 7-ին ԶՊՄԿ-ում գործադուլի ֆոնին 8 աշխատակցի ազատել էին աշխատանքից՝ տեղեկացնելով, որ այդ պահից նրանց հայտարարությունները կրում են «մասնավոր բնույթ»: ԶՊՄԿ-ն փետրվարի 9-ին հայտարարել է, որ «ընկերության հետ առնչություն ունեցող անձինք հրապարակայնորեն և ուղղակի սպառնալիքներով կոչ են անում իրենց աշխատակիցներին չգնալ աշխատանքի և խոչընդոտել ընկերության գործունեությունը»։
ԶՊՄԿ-ն 2024 թվականի արդյունքներով գլխավորել էր Հայաստանի 1000 խոշոր հարկատուների ցանկը։ 2024 թվականի դեկտեմբերին վարչապետ Նիկոլ Փաշինյանը հայտարարել էր, որ ԶՊՄԿ-ն ՀՀ պետական բյուջե էր փոխանցել 33,25 մլրդ դրամ՝ որպես կառավարության շահաբաժին։
