2022 թվականի առաջին կիսամյակում «Հարավկովկասյան երկաթուղի» ընկերությունը փոխադրել է 1,5 մլն տոննա բեռ, ինչը 2021 թվականի նույն ժամանակահատվածի համեմատ համադրելի ցուցանիշ է: Այս մասին հայտնում է ՀԿԵ-ն։
Արտահանման հաղորդակցությունում փոխադրվել է 223,6 հազար տոննա բեռ, գրեթե նույնքան, ինչ նախորդ տարի, ներմուծման հաղորդակցությունում ՝ 329,7 հազար տոննա կամ 31,5 տոկոսով ավելի, քան 2021 թվականին։ Տեղական հաղորդակցությունում փոխադրվել է 926,3 հազար տոննա ՝ 2021 թվականի առաջին կիսամյակի համեմատ 6,4 տոկոս անկումով:
Հաշվետու ժամանակահատվածում փոխադրվել է 148 հազար տոննա արդյունաբերական հումք և 75,3 հազար տոննա կոնտեյներային բեռ։ Փոխադրվել է նաև 188,6 հազար տոննա նավթալից բեռ, ինչը 16,8 տոկոսով գերազանցում է 2021 թ. ցուցանիշը։
Ընկերությունը մեծ ծավալի աշխատանքներ է իրականացնում երկաթուղով բեռներ փոխադրելու ներգրավման ուղղությամբ ։ Վրացական և ռուսական երկաթուղիների օպերատորների հետ համատեղ իրականացվում է սակագնային ձևավորման ճկուն քաղաքականություն, կիրառվում են տարբեր տեսակի բեռների փոխադրման զեղչեր: 2022 թվականի հուլիսի 1-ից Փոթի, Բաթումի, Սամտրեդիա կայարաններից դեպի Հայաստանի ուղղությամբ արագացված կոնտեյներային գնացքի կազմում մեծ տարողությամբ բեռնարկղերի փոխադրման միասնական միջանցիկ դրույքաչափ է սահմանվել։
Այս տարի ՀԿԵ-ն կշարունակի բեռնափոխադրումների համար շարժակազմի վերանորոգման և թարմացման գործընթացը։ Մասնավորապես՝ ընկերությունը նախատեսում է մինչև տարեվերջ գնել 48 նոր կիսավագոն։
