Երգիչ Էրիկ Կարապետյանն իր «Ոչ ավել, ոչ պակաս» երգն ադրբեջանական ներկայացնելու համար իրավական գործընթաց է սկսել։ Երգիչն այդ մասին հայտարարել է Instagram-ի իր էջում։
Նա հայտնել է, որ այն ռուսական հեռուստաալիքով որպես ադրբեջանական երգ են ներկայացրել, ինչը, երգչի խոսքով, ցավալի և ամոթալի է։
««Ոչ ավել , ոչ պակաս» երգն առանց որևէ թույլտվության տարիներ շարունակ անօրինական կերպով ձևափոխել, աղավաղել ու կատարել են աշխարհի տարբեր լեզուներով ու երկրներում։ Բայց համբերությանս բաժակս լցվեց, երբ օրեր առաջ ռուսական Россия 1 պետական ալիքով Воскресное шоу Андрея Малахова-ի եթերում երկրորդ անգամ իմ երգն առանց որևէ թուլատվության և աղավաղված տարբերակով հնչեց ադրբեջանցիների կատարմամբ»,- մանրամասնել է երգիչը։
Նա հավելել է, որ երգը գրել է 2018 թվականին։ Երաժշտության հեղինակն ինքն է, իսկ խոսքերի հեղինակը՝ երգիչ, երգահան Գրիգոր Կյոկչյանը։
«Հարցին տվել եմ իրավական ընթացք, և օրենքի սահմաններում իմ հեղինակային իրավունքների համար պայքարելու եմ մինչև վերջ։ Նշեմ, որ ստեղծագործությունն առանց հեղինակի թույլտվության օգտագործելը, փոփոխելը՝ հեղինակային իրավունքի խախտում է և ստեղծագործության աղավաղում։ Ցավ եմ ապրում, որ մեր հայրենակիցների ստվար զանգված լսում է հենց այդ տարբերակները»,- գրել է երգիչը։
