Արցախցի գրող Աստրիդ Քամալյանի դեբյուտային գիրքը՝ «ԲԱԲՈ. Հայկական գորգերի լվացման օր»-ը, ընդգրկվել է 2023 թվականի Նյու Յորքի հանրային գրադարանի (NYPL) լավագույն գրքերի ցանկում, հայտնում է գրադարանի կայքը։
«Կենդանի տեքստով և վառ նկարազարդումներով Աստրիդ Քամալյանը կյանքի է կոչում իր մանկության հմայիչ հիշողությունները՝ հրավիրելով երիտասարդ ընթերցողներին անցկացնել զվարճանքով և սիրով լի օր հայ ընտանիքի հետ»,- ասվում է հաղորդագրության մեջ:
Գրքում հեղինակը խոսում է գորգեր լվանալու հայկական ավանդույթի մասին՝ մանկության վառ հիշողություն Հայաստանի և Արցախի բազմաթիվ բնակիչների համար։ Գրքի վաճառքից ստացված հասույթի մի մասը Քամալյանը նվիրաբերում է Կարմիր Խաչին և Լեռնային Ղարաբաղից հարկադիր տեղահանվածներին աջակցող այլ կազմակերպություններին, ասել է նա Instagram-ում։
Նոյեմբերի 17-ին Նյու Յորքի գրադարանն իր հումանիտար հետազոտությունների կենտրոնն անվանակոչել էր ամերիկահայ պատմաբան և «Ավրորա» մարդասիրական նախաձեռնության համահիմնադիր Վարդան Գրեգորյանի անունով։
