Երևանի 10 ընտրատարածքային ընտրական հանձնաժողովներն ամփոփել են 78 տեղամասերում իրականացված վերահաշվարկի արդյունքները, հայտնում են Կենտրոնական ընտրական հանձնաժողովից։
Վերահաշվարկի արդյունքներով՝ «Հանրային ձայն» կուսակցության օգտին ավելացել է 16 քվեաթերթիկ, «Քաղաքացիական պայմանագիր» կուսակցության՝ 31 քվեաթերթիկ, «Արդար Հայաստան» կուսակցության՝ 5 քվեաթերթիկ, «Հաղթանակ» կուսակցության՝ 1 քվեաթերթիկ, «Ուժը հայրենյաց» կուսակցության՝ 6 քվեաթերթիկ, «Ազգային առաջընթաց» կուսակցության՝ 32 քվեաթերթիկ, «Հանուն սոցիալական արդարության» կուսակցության՝ 1 քվեաթերթիկ, «Լուսավոր Հայաստան» կուսակցության՝ 4 քվեաթերթիկ, «Ապրելու երկիր» կուսակցության՝ 4 քվեաթերթիկ, «Մայր Հայաստան» դաշինքինը՝ 67 քվեաթերթիկ։
ԿԸՀ-ից հայտնում են, որ «Հայաստանի եվրոպական կուսակցության» քվեաթերթիկները պակասել են 2-ով, «Հանրապետություն» կուսակցությանը՝ 3-ով, «Միացյալ Հայաստան» կուսակցությանը՝ 5-ով, «Ժողովրդավարական Համախմբում» կուսակցությանը՝ 3-ով։
Հայտնում են, որ անվավեր քվեաթերթիկների թիվը պակասել է 266-ով, անճշտությունների չափը՝ 10-ով։
Ըստ նախնական տվյալների՝ Երևանի ավագանու մանդատները բաշխվում են հետևյալ կերպ․ ՔՊ՝ 24 մանդատ, «Ազգային առաջընթաց»՝ 14 մանդատ, «Մայր Հայաստան» դաշինք՝ 12 մանդատ, «Հանրապետություն»՝ 8 մանդատ, իսկ «Հանրային ձայն»՝ 7 մանդատ։
Երևան համայնքի ընտրողների ռեգիստրում հաշվառված 824 250 քաղաքացուց քվեարկությանը մասնակցել է 234 553 քաղաքացի կամ ընտրական իրավունք ունեցող քաղաքացիների 28.46%-ը։
Ավագանու ընտրություններին մասնակցող 14 քաղաքական ուժերից 5-ը հաղթահարել է կուսակցությունների համար նվազագույն 4% և դաշինքների համար 6% շեմը: «Քաղաքացիական պայմանագիր» կուսակցությունը (ցուցակը գլխավորում է Տիգրան Ավինյանը) հավաքել է 32,57 տոկոս կամ 75,463 ձայն: «Ազգային առաջընթաց» կուսակցությունը (ցուցակը գլխավորում է Հայկ Մարությանը) հավաքել է 18,89 տոկոս կամ 43,765 ձայն: «Մայր Հայաստան» դաշինքը (ցուցակը գլխավորում է Անդրանիկ Թևանյանը) հավաքել է 15,43 տոկոս կամ 35,739 ձայն: «Հանրապետություն» կուսակցությունը (ցուցակը գլխավորում է Արտակ Զեյնալյան) ստացել է 11,32 տոկոս կամ 26,236 ձայն, «Հանրային ձայն» կուսակցություն-9,68% (ցուցակը գլխավորում է Արտակ Գալստյանը):
