Բահրեյնի, Սաուդյան Արաբիայի և Օմանի քաղաքացիները Հայաստան կայցելեն առանց մուտքի վիզայի

ՀՀ կառավարությունը մայիսի 22-ի նիստում հավանություն է տվել նախագծին, որով Բահրեյնի, Սաուդյան Արաբիայի և Օմանի քաղաքացիները, ինչպես նաև մի շարք երկրներում կացության կարգավիճակ ունեցողները, Հայաստան կայցելեն առանց մուտքի վիզայի։ Արտգործնախարար Արարատ Միրզոյանը մանրամասնել է, որ առանց մուտքի վիզայի Հայաստան այցելելու հնարավորություն կստանան նաև այն քաղաքացիները, որոնք ԱՄՆ-ի, Եվրոպական միության, Շենգենյան համաձայնագրի երկրների, Արաբական Միացյալ Էմիրությունների, Բահրեյնի, Կատարի, Սաուդյան Արաբիայի, Քուվեյթի կամ Օմանի տարածքում կացության կարգավիճակ ունեն։ Միրզոյանը շեշտել է, որ նախագծի ընդունումը տնտեսական նշանակություն ունի։ «Ակնհայտ է, որ այս փոփոխությամբ կհեշտացնենք մարդկանց այցելությունները մեր երկիր, ինչպես նաև կմեծացնենք ներդրումային գրավչությունը»,- հավելել է նա: Էկոնոմիկայի նախարար Գևորգ Պապոյանն, իր հերթին, նշել է, որ փոփոխությունից հետո ակնկալում են դեպի ՀՀ զբոսաշրջային հոսքեր, ուղիղ չվերթերի ավելացում: «Մերձավոր Արևելքի շուկան մեզ համար կարևոր ուղղություններից է, գործարար համայնքը ողջունում է նախագիծը։ Այս փոփոխությունը կհեշտացնի պոտենցիալ ներդրողների մուտքը Հայաստան»,- ընդգծել է Պապոյանը։ Կառավարության նիստից հետո Պապոյանը նշել է, որ որոշումը դրական ազդեցություն է ունենալու հատկապես ՀՀ ներգնա զբոսաշրջության վրա։ «Սա լավ ուղերձ է տուրիստական բիզնեսով զբաղվող մեր գործարարներին, ռեստորաններին։ Կոչ կանեմ գործարար համայնքին պատրաստվել զբոսաշրջային հոսքերին։ Մերձավոր Արևելքի շուկան Հայաստանի համար զբոսաշրջության նոր ռազմավարությամբ առաջնային շուկաներից մեկն է դառնալու»,- ընդգծել է Պապոյանը։ Ապրիլին կառավարությունն Օմանում ՀՀ ռեզիդենտ դեսպանություն բացելու որոշում էր ընդունել։