ՀՀ վարչապետ Նիկոլ Փաշինյանն Արտաքին գործերի նախարար Արարատ Միրզոյանի միջոցով փորձում է կապի դուրս գալ Ռուսաստանի ղեկավարության հետ և որոշակի մեսիջներ հղել, գրել է «Իրավունք» թերթը։
Ըստ ԶԼՄ-ի՝ իշխանությունները խնդիր են դրել մինչ ռուսների և ամերիկացիների ինտենսիվ բանակցությունների մեկնարկը՝ ցույց տալ, որ հայաստանյան իշխանություններն առնվազն լոյալ են պաշտոնական Մոսկվայի հանդեպ:
Թերթի տեղեկություններով՝ դիվանագիտական խողովակներով դա անել չի ստացվում, քանի որ ՌԴ ԱԳ նախարար Սերգեյ Լավրովը գտնվում է Սաուդյան Արաբիայում և խիստ զբաղված է ամերիկացիների հետ բանակցություններով:
«Փաշինյանին ոչինչ չի մնում, քան ՌԴ-ում հայազգի մեծահարուստների միջոցով ինչ-ինչ հարցեր լուծել»,- գրել է թերթը:
Լրատվականը նաև նշել է, որ իշխանական պատգամավորների պնդումները, թե Եվրամիությանն անդամակցելու գործընթացի մեկնարկի մասին նախագծին կողմ քվեարկելը դեռ չի նշանակում, որ իշխող ուժը պատրաստ է Հայաստանը տանել Եվրամիության անդամակցման, ուղղված է նույն խնդրին։
Փետրվարի 12-ին Հայաստանի խորհրդարանը 63 կողմ, 7 դեմ ձայների հարաբերակցությամբ հավանություն էր տվել ԵՄ-ին անդամակցության մեկնարկի մասին օրինագծին։ 2025 թվականի հունվարի 9-ին ՀՀ կառավարությունը հավանություն էր տվել ԵՄ-ին երկրի անդամակցության գործընթաց սկսելու օրինագծին։
«Քաղաքացիական պայմանագիր» խմբակցությունը հայտարարել էր ԵՄ-ին երկրի անդամակցության գործընթացի մեկնարկի նախագծին «կողմ» քվեարկելու իր մտադրության մասին` քվեարկությունից առաջ 20 րոպե ընդմիջում վերցնելով քննարկման համար: Ընդդիմադիր «Հայաստան» խմբակցությունը հրաժարվել էր մասնակցել քվեարկությանը։ «Պատիվ ունեմ»-ը հունվարի 11-ին հայտարարել էր, որ իր պատգամավորները դեմ են քվեարկելու նախագծին։
ԵՄ-ին Հայաստանի անդամակցության վերաբերյալ առաջին քննարկումներն սկսվել էին, երբ 2024 թվականի մարտի 13-ին Եվրախորհրդարանը հավանություն էր տվել Հայաստանին ԵՄ անդամակցության թեկնածուի կարգավիճակ տրամադրելու առաջարկին: 2024 թվականի հուլիսի 1-ին «Հայկական ժողովրդավարության ֆորումի» ժամանակ ՀՀ վարչապետ Նիկոլ Փաշինյանը ոչ նպատակային էր անվանել ԵՄ-ին անդամակցելու վերաբերյալ հանրաքվեի անցկացումը։
2024 թվականի հունիսի 21-ին Հայաստանի խորհրդարանը լսումներ էր անցկացրել ԵՄ անդամակցության հայտի հանրաքվեի վերաբերյալ՝ հետևելով «Ժողովրդավարական ուժերի հարթակ» նախաձեռնող խմբի առաջարկին, որն անցած տարվա հոկտեմբերի վերջին հայտարարել էր, որ հանրաքվեի համար անհրաժեշտ 50 հազար ստորագրության փոխարեն հավաքվել է 60 հազար ստորագրություն։
