Ադրբեջանը շարունակում է «այն, ինչ ուզում եմ, տվեք բանակցային եղանակով, հակառակ դեպքում կվերցնեմ պատերազմով» քաղաքականությունը, կառավարության փետրվարի 15-ի նիստում ասել է ՀՀ վարչապետ Նիկոլ Փաշինյանը՝ անդրադառնալով փետրվարի 12-ին Ներքին Հանդի տարածքում տեղի ունեցած սահմանային միջադեպին։
«Իրադարձությունների նկարագրությունը ցույց է տալիս, որ Ադրբեջանի մտադրությունները շարունակում են մնալ նույնը՝ ռազմական հարկադրանքի քաղաքականություն վարել Հայաստանի նկատմամբ»,- ասել է նա՝ անդրադառնալով փետրվարի 13-ին Ադրբեջանի կրակոցներին, որի հետևանքով հայկական կողմը 4 զոհ և 1 վիրավոր ունի։
Հայաստանի դեմ պատերազմ սկսելու Բաքվի մտադրության մասին, ըստ Փաշինյանի, վկայում է նաև Ադրբեջանի անհամաձայնությունը Հայաստանի կողմից երկու երկրների սահմանը նշելու տարբերակների հետ։
Նա մատնանշել է, որ Ադրբեջանի գործելաոճի վերլուծությունը ցույց է տալիս, թե սրա համար կարող է լինել մեկ պատճառ, օրինակ՝ ռազմական գործողություններ սկսելը սահմանի որոշ հատվածներում, հետագայում ռազմական էսկալացիան Հայաստանի Հանրապետության դեմ լայնածավալ պատերազմի վերածելու հեռանկարով:
«Այս մտադրությունն ընթերցվում է պաշտոնական Բաքվից հնչող բոլոր հայտարարություններում ու գործողություններում: Ադրբեջանը շարունակում է սպառնալից հռետորաբանությունը նաև մեր բանակի բարեփոխումների և ՀՀ-ի կողմից սպառազինության և տեխնիկա ձեռք բերելու կապակցությամբ»,- նշել է Փաշինյանը։
Նա ընդգծել է, որ ուժեղ և մարտունակ բանակ ունենալը յուրաքանչյուր երկրի լեգիտիմ իրավունքն է, սա որևէ մեկը չի կարող ժխտել:
Հայ-ադրբեջանական սահմանին լարվածության նոր ալիք էր սկսվել փետրվարի 12-ին, երբ ադրբեջանական կողմը հայտնել էր հայկական դիրքապահի կողմից արձակած կրակի հետևանքով իր մեկ վիրավորի մասին: Հայկական կողմը հայտարարել էր, որ Հայաստան-Ադրբեջան պետական սահմանի Կապան-Զանգելան հատվածում հայ դիրքապահների կողմից կրակ բացելու տեղեկատվությունը հետաքննվում է, նախնական տեղեկատվությամբ՝ փետրվարի 12-ին տվյալ տեղամասում նման իրադրություն առկա չի եղել:
ՀՀ ՊՆ-ն հերքել էր, որ փետրվարի 12-ին՝ ժամը 20:50-ից մինչև 23:40-ն ընկած ժամանակահատվածում հայկական կողմը կրակ էր բացել սահմանագոտու հյուսիսարևելյան հատվածում տեղակայված ադրբեջանական դիրքերի ուղղությամբ:
ՀՀ ՊՆ-ն փետրվարի 13-ին հայտնել էր, որ սահմանին ադրբեջանական կողմի կրակի հետևանքով հայկական կողմն ունի 4 զոհ և 1 վիրավոր։ Գերատեսչությունը հրապարակել էր զոհված զինվորականների անունները։
