Միջազգային հանրապետական ինստիտուտի (IRI) անցկացրած հարցման համաձայն՝ հայ հասարակությունն ամենաշատը գոհ է ՀՀ զինված ուժերից։ Տվյալները հավաքագրվել են հեռախոսային հարցման միջոցով՝ հունիսի 16-26-ը 1505 քաղաքացու շրջանում։
Հարցվածների 43%-ը նշել է, որ «լիովին գոհ է», իսկ ևս 29%-ն «ավելի շուտ գոհ է» ԶՈւ-ի աշխատանքից։
Այս վարկանիշում երկրորդ տեղում է Հայ Առաքելական եկեղեցին, որին աջակցում է հարցվածների 34%-ը, ևս 24%-ը նշել է, որ «ավելի շուտ գոհ է»։ Մարդու իրավունքների պաշտպանի գրասենյակը և վարչապետի գրասենյակն, ըստ հարցման, ունեն 15% աջակցություն։
ՀՀ խորհրդարանը վարկանիշի ամենաներքևում է. հարցվածների միայն 7%-ն է հավանություն տվել օրենսդիրի աշխատանքներին։ Կառավարության գլխավոր նվաճումը Հայաստանում համարվում է ճանապարհների բարելավումը, իսկ ամենամեծ ձախողումը՝ սխալ արտաքին քաղաքականությունը։
Հարաբերական մեծամասնությունը (35%) ազգային անվտանգության և սահմանային հարցերը նշել է որպես երկրի գլխավոր խնդիր։ Հաջորդում են տնտեսության, գործազրկության և քաղաքական անկայունության խնդիրները։ Հարցվածներն Իրանը, Ֆրանսիան և Ռուսաստանն անվանել են Հայաստանի հիմնական քաղաքական և անվտանգության գործընկերներ։
Կարծիքները կիսվել են Հայաստանի և Ադրբեջանի միջև խաղաղության համաձայնագրի թեմայի շուրջ. 33%-ն «ավելի շուտ դեմ» է, 29%-ը՝ լիովին կողմ։ Հայ հասարակությունը համաձայնագրում տեսնում է պատերազմի վերսկսման, տարածքների կորստի սպառնալիք և նույնիսկ մտահոգություն է հայտնում ցեղասպանության հնարավոր սպառնալիքի վերաբերյալ։ Մտահոգության առիթ է դարձել նաև Հայաստանի տարածքում ադրբեջանցիների հնարավոր անարգել տեղաշարժը, ինչպես նաև այն փաստը, որ համաձայնագիրը չի լուծում գերիների վերադարձի հարցը։
Հարցումը նաև բացահայտել է երիտասարդների շրջանում քաղաքական անտարբերության աճի նշաններ. 18-35 տարեկան հարցվածների 37%-ը նշել է, որ չի քվեարկի, եթե խորհրդարանական ընտրությունները կայանան հաջորդ կիրակի։
Կարդացեք նաև՝
Վստահության ճգնաժամ. ինչպես կքվեարկեն ՀՀ բնակիչներն ընտրություններում. Armenia Today-ի հարցումը
