ԱԺ-ում գումարով զինծառայությունից ազատվելու նախագծի վերաբերյալ «Քաղաքացիական պայմանագիր» խմբակցությունը Պաշտպանության նախարար Սուրեն Պապիկյանի մասնակցությամբ գիտական բովանդակային քննարկում է ունեցել, հայտնել է ՔՊ պատգամավոր Արմեն Խաչատրյանը։
Նա նշել է, որ քննարկելու են նախագիծն ու հնարավորինս լավարկելու են։
«Եթե հասկանանք, որ մեր առջև դրված խնդիիրներն արդեն լուծվում են, հանրային կոնսենսուսն արդեն կա, և այն բոլոր մտահոգությունները, որոնք հանրության մեջ և մեր գործընկերներն ունեին, փարատված կլինեն, նախագիծը կգնա ընդունման ճանապարհով»,- ասել է նա։
Ըստ Խաչատրյանի՝ հիմնական տարընկալումն ու տարակարծությունը գումարով կարճ ժամանակ ծառայելու նորմի հետ է կապված։ Նա հավելել է, որ վստահ չէ՝ այս նստաշրջանում հարցը կքննարկվի՞, թե՞ ոչ․ «Դժվարություն կլինի, ուրեմն հրատապ ռեժիմով նիստ պետք գումարվի»։
Խաչատրյանն ընդգծել է, որ նախագծի ընդունումը կարող է բացասական ազդել ընտրություններում ՔՊ-ի վարկանիշի վրա, սակայն իշխող կուսակությունը կարևորում է ազգային անվտանգության հարցը, ինչպես նաև ի նպաստ բանակի ռեսուրսների ավելացմանը։
Մայիսի 22-ին կառավարությունը հավանություն էր տվել «Քաղաքացիական պայմանագիր» խմբակցության պատգամավոր Հայկ Սարգսյանի նախագծին, ըստ որի՝ ովքեր ցանկանում են ծառայել 24 ամսից քիչ, կարող են որոշակի գումար վճարել պետբյուջե։ Մեկ ամսվա ծառայության դեպքում վճարը կլինի 24 մլն դրամ (62,5 հազար դոլար), իսկ 4 ամսվա ծառայության համար՝ 18 մլն դրամ (46,8 հազար դոլար)։
