Հայաստանի պաշտպանության նախարարությունը լրատվամիջոցներին կոչ է արել զգոն լինել Telegram-ով տարածվող բանակի մասին տեղեկատվության նկատմամբ։ Այս մասին հայտարարություն է տարածել ՊՆ մամուլի քարտուղար Արամ Թորոսյանը։
Նա հայտնել է, որ վերջին շրջանում Telegram հարթակում ակտիվացել են անհայտ ծագման մի քանի ալիքներ, որոնք ստեղծվել են արտերկրում։
«Չնայած այն հանգամանքին, որ այդ ալիքներում հրապարակված բովանդակությունը հայերեն է, կան հիմնավոր կասկածներ և որոշ տեղեկություններ, որ դրանք ստեղծվել են Հայաստանից դուրս»,- նշել է Թորոսյանը։
ՊՆ խոսնակը լրագրողներին զգուշացրել է բանակի վերաբերյալ որևէ տեղեկություն հրապարակելուց առաջ անհրաժեշտ պարզաբանումներ կատարել գերատեսչության համապատասխան ստորաբաժանման հետ։
«Բանակին, նրա դիրքերին և, ընդհանուր առմամբ, պաշտպանության ոլորտին վերաբերող տեղեկություն հրապարակելիս անհրաժեշտ է ճշտումներ կատարել ՀՀ ՊՆ համապատասխան վարչության հետ»,- եզրափակել է Թորոսյանը։
