ՊՆ մամուլի քարտուղար Արամ Թորոսյանը, վաղ առավոտից ճշտումներ կատարելուց հետո Armenia Today-ին հայտնեց, որ «Ժողովուրդ» օրաթերթում հրապարակված «Շրջափակման մեջ գտնվող ադրբեջանցի զինծառայողներն անարգել վերադարձել են Ադրբեջան» վերտառությամբ հոդվածի աղբյուրը «այնքան էլ հավաստի չէ»:
«Երբեմն մամուլի այդ «խիստ հավաստի աղբյուրներն» այնքան էլ հավաստի չեն»,- ասաց Թորոսյանը:
Մեր հարցին, թե այնուամենայնիվ ադրբեջանցի զինծառայողներից կազմված ջոկատները, որոնք, ըստ ԳՇ պետ Էդվարդ Ասրյանի, առաջ էին եկել ստորաբաժանումներով, խմբերով և նրանցից որոշները հայտնվել են հայկական ստորաբաժանումների շրջափակման մեջ, վերադարձվե՞լ են Ադրբեջանին, ՊՆ մամուլի քարտուղարը հստակ պատասխան չտվեց:
Հիշեցնենք, որ «Ժողովուրդ» օրաթերթը՝ հղում անելով ՀՀ ՊՆ-ին մոտ կանգնած իր «խիստ հավաստի աղբյուրներին» գրել էր, որ Հայաստան ներթափանցած ադրբեջանական զինված խումբն այս օրերին անփորձանք հետ է գնացել Ադրբեջան:
Սեպտեմբերի 13-ի կեսգիշերից ադրբեջանական զինուժը հրետանու, խոշոր տրամաչափի զինատեսակների և անօդաչու թռչող սարքերի կիրառմամբ սկսել է գնդակոծել հայկական դիրքերն ու քաղաքացիական օբյեկտները Գորիսի, Սոթքի, Ջերմուկի և Սյունիքի, Գորիսի, Վայոց ձորի այլ բնակավայրերի ուղղությամբ։
ՀՀ վարչապետ Նիկոլ Փաշինյանի խոսքով՝ 10 քառ. հանրապետության կմ տարածք անցել Ադրբեջանի ԶՈւ-ի վերահսկողությանը: Վերջին տվյալներով՝ հայկական կողմից զոհվածների և անհետ կորածների թիվը 207 մարդ է։ Սեպտեմբերի 28-ին սահմանին ադրբեջանական սադրանքի արդյունքում ևս 3 հայ զինծառայող է զոհվել։
Ադրբեջանն իր կողմից հայտնել է 77 մահվան մասին։ Հայաստանի կառավարությունը դիմել է Ռուսաստանին, ՄԱԿ-ի Անվտանգության խորհրդին և ՀԱՊԿ-ին՝ կապված Ադրբեջանի ագրեսիայի հետ։ Սեպտեմբերի 14-ի երեկոյան Երևանն ու Բաքուն միջազգային հանրության աջակցությամբ կարողացան պայմանավորվել զինադադարի շուրջ։
