Թուրքիայի ազգային անվտանգության խորհուրդը, ի թիվս այլ հարցերի, քննարկել է Հայաստանի և Ադրբեջանի միջև խաղաղության գործընթացը, ասվում է խորհրդի նիստի արդյունքներով հրապարակված հաղորդագրությունում:
«Խորհուրդը ողջունել է Ադրբեջանի և Հայաստանի միջև խաղաղության համաձայնագրի ուղղությամբ առաջընթացը՝ հույս հայտնելով, որ վերջնական համաձայնագիրը կծառայի տարածաշրջանային բոլոր խաղացողների առավել լայն շահերին: Այն վերահաստատել է Թուրքիայի ակնկալիքը, որ Հարավային Կովկասում կայուն խաղաղություն ապահովելու համար անհրաժեշտ բոլոր պայմանները կկատարվեն»,- նշվում է հայտարարությունում։
Ադրբեջանը մարտի 13-ին հայտարարել էր Հայաստանի հետ խաղաղության պայմանագրի տեքստի համաձայնեցման մասին։ Երևանն ընդունել էր պայմանագրի երկու չհամաձայնեցված կետի վերաբերյալ առաջարկները՝ միմյանց դեմ միջազգային դատարաններում փոխադարձ հայցերից հրաժարվելու և երրորդ երկրների ներկայացուցիչների ներկայությունը սահմանին չթույլատրելու մասին։ ՀՀ ԱԳՆ-ն նույն օրը հաստատել էր այդ տեղեկատվությունը և հայտնել, որ պատրաստ է քննարկել փաստաթղթի ստորագրման ժամկետը և վայրը։
ՀՀ վարչապետ Նիկոլ Փաշինյանը Մեծ Հայրենական պատերազմում Հաղթանակի 80-ամյակի կապակցությամբ հղած շնորհավորական ուղերձում հայտարարել էր, որ «ի հեճուկս բոլոր սադրանքների»՝ Երևանի և Բաքվի միջև պատերազմ չի լինելու: Նա հիշեցրել էր, որ խաղաղության պայմանագրի նախագիծը համաձայնեցված է և սպասում է ստորագրմանը։
