Մարտի 11-ին երգչուհի, Կոմիտասի անվան պետական կոնսերվատորիայի դասախոս Աննա Պողոսյանն ահազանգել էր ԿԳՄՍ նախարարության կողմից բուհը փակելու մտադրության մասին (բուհերի խոշորացման ծրագրով բուհերը կմիավորվեն «Ակադեմիական քաղաքում» – խմբ․)։ Տարածվել էր նաև բուհերի ցանկ, որոնք, ըստ ահազանգերի, ԿԳՄՍ-ն պատրաստվում է միավորել։ Մարտի 12-ին նախարարությունը բացատրել էր, որ նշվածն այն բուհերի ցանկն է, որոնք ընդգրկվելու են ՀՀ պետական բուհերի խոշորացման և գիտահետազոտական կազմակերպությունների հետ ինտեգրման գործընթացի աշխատանքային խմբերի կազմում։
ԿԳՄՍ-ից ընդգծել էին, որ նշված ցանկը ոչ թե բուհերի միավորման կամ խոշորացման, այլ աշխատանքային խմբերի ձևավորման մասին է։
Զուգահեռ՝ «Ակադեմիական քաղաք»-ի շուրջ դժգոհությունները չեն դադարում։ Կոնսերվատորիայի՝ «Ակադեմիական քաղաքին» միանալու որոշման դեմ ձևավորվել է «Կոնսերվատորիայի միասնական շարժում» նախաձեռնությունը, որի անդամները պնդում են, որ բուհը «չի՛ տեղափոխվելու, չի՛ միանալու այլ բուհի-ի, «Ակադեմիական քաղաքի» մաս չի՛ կազմելու»։ Բացի այդ, երաժիշտները change.org կայքում ստորագրահավաք են սկսել, որտեղ անհեթեթ են համարել ուսումնական հաստատությունը տեղափոխելու կամ միավորելու առաջարկը։ Այս պահին ավելի քան 2500 ստորագրություն կա։
«Մենք՝ երաժիշտներս, մեր ուսումնական հաստատությունը տեղափոխելու կամ միավորելու առաջարկը համարում ենք անհեթեթ և անընդունելի: Կոնսերվատորիան Հայաստանի մշակութային ժառանգության խորհրդանիշն է, ավելի քան 100 տարի է, ինչ գոյություն ունի և արդեն 50 տարի է, ինչ գտնվում է նույն շենքում: Եվ եթե մենք 20-50 տարին մեկ փոխենք մեր մշակույթի համար այդքան կարևոր վայրերի տեղը, ապա արդյունքում ոչ մի մշակութային ժառանգություն չենք ստանա։ Բուհերի նախատեսվող միավորումը կարող է խորհրդանիշի կորստի հանգեցնել։ Կոնսերվատորիայի նշանակությունը չի կարող կրճատվել կամ անտեսվել»,- ասված է ստորագրահավաքի խնդրագրում։
Մարտի 13-ին ԵՊԿ ռեկտոր, պրոֆեսոր Սոնա Հովհաննիսյանը գրառմամբ անդրադարձել է Կոնսերվատորիան առանձին կարգավիճակով պահպանելու հիմնավորումներին։ Կոնսերվատորիայի դիրքի ու կրթության կազմակերպման առանձնահատկությունները նշելով՝ նա ընդգծել է, որ այդ ամենի խաթարումը նոր խնդիրների կհանգեցնի։
«Կոնսերվատորիան այլ արվեստի բուհերի հետ միավորելն առաջ կբերի մի շարք նոր խնդիրներ: Կոնսերվատորիական կրթության առանձնահատկությունների խաթարումն ավելորդ խոչընդոտներ է ստեղծելու երաժիշտների պրոֆեսիոնալ կայացման համար։ «Կոնսերվատորիա» անվանումը չի կրկնում որևէ բուհի անվանում։ Ունենալով համալսարանական ընդգրկում, այն ո՛չ համալսարան է և ո՛չ էլ ինստիտուտ։ Սա ևս երաժշտական կրթության ինքնատիպության մասին է խոսում, ինչը պատահական լինել չի կարող։ Որպես առանձին համակարգ՝ այն գործում է առավել ճկուն, մոբիլ է և կերպարային իմաստով՝ ամբողջական»,- ընդգծել է ռեկտորը։
Հովհաննիսյանն ընդգծել է, որ այլ բուհերի համեմատ մի քանի անգամ ցածր աշխատավարձի պայմաններում աշխատող դասախոսներն ապահովում են երաժշտապրոֆեսիոնալ կադրեր։
«Տեխնոլոգիաները, թվայնացման նորագույն նվաճումներն ու արհեստական ինտելեկտը դեռևս չեն ստեղծել հին վարպետներ՝ Ստրադիվարիուսի, Գվարներիի որակի և կատարելության գործիքներ։ Այսօր էլ հնագույն ջութակը մնում է անգերազանցելի, և այն ձեռքն առնելը լրջագույն վաստակ է պահանջում։ Սա մեր ոլորտի առեղծվածներից է։ Ամեն բանի նորը չէ, որ լավ է՝ որքան էլ պարադոքսալ հնչի։ Հարմոնիայի դասընթացի կարևորագույն օրենքն ասում է՝ հարմոնիայի խնդիրը ճիշտ է լուծված, բայց երաժշտականորեն՝ վատ։ Ինչպե՞ս բացատրել սա ոլորտից հեռու մարդկանց, չգիտեմ, քանի որ ակադեմիական երաժշտությունն իր օրենքներն ու բանաձևերն ունի։ Օրական 8-10 ժամ պարապող ուսանողի և առավոտից մինչև ուշ երեկո Կոնսերվատորիայում գտնվող դասախոսի ծանրաբեռնվածությունը պետականորեն վերակազմակերպելու կարիք ամենևին չկա։ Համավարակի ծանր շրջանն ուղղակի ողբերգություն էր Կոնսերվատորիայի համար»,- գրել է ռեկտորը։
ԿԳՄՍ նախարար Ժաննա Անդրեասյանը մարտի 14-ի ճեպազրույցի ժամանակ հայտնել է, որ օրերս քննարկում է եղել, որին մասնակցել են նաև Կոնսերվատորիայի ներկայացուցիչները։ Նա «Ակադեմիական քաղաքի» շուրջ գործընթացը «բարդ» է որակել։
«Շատ բարդ ու բազմաշերտ գործընթաց է։ Պարզ է, որ շատ հարցեր պետք է հաշվի առնվեն։ Մենք սիրով կլսենք դասախոսների և ուսանողների կարծիքները»,- ասել է նախարարը։
Հարցին՝ ԿԳՄՍ նախարարությունը հնարավո՞ր է վերանայի բուհերի միավորման ծրագիրն ու առանձնացնի Կոնսերվատորիայի հարցը, նա նշել է, որ ծրագիրն օրենք է։
«Բուհերի և գիտահետազոտական կազմակերպությունների միավորման ծրագիրն օրենք է՝ կրթության զարգացման մինչև 2030 թվականի պետական ծրագիրը հաստատված է ԱԺ-ի կողմից»,- հավելել է նախարարը։
2022 թվականի սեպտեմբերի 1-ին ՀՀ վարչապետ Նիկոլ Փաշինյանը հայտարարել էր կրթության ոլորտում բարեփոխումների մասին, որոնց շրջանակում նախատեսվում է Հայաստանում ստեղծել 8 միավորված գիտահետազոտական համալսարան՝ պետական լիարժեք ֆինանսավորմամբ, ինչպես նաև կառուցել «Ակադեմիական քաղաք», որտեղ կտեղափոխվեն բոլոր բուհերը:
