Իսրայելական բանակը Գազայի երեք բնակավայրում մարտական գործողությունների ժամանակավոր դադար է հայտարարել

Իսրայելական բանակը Գազայի երեք բնակավայրում մարտական գործողությունների դադար է հայտարարել՝ սովի առնչությամբ մտահոգությունների աճի պատճառով, հայտնում է AP գործակալությունը։

Նշվում է, որ կիրակի օրն Իսրայելի զինված ուժերը գործողությունների դադար են հայտարարել Գազայի երեք բնակեցված տարածքում՝ օրական 10 ժամով։

Զինվորականները հայտարարել են, որ «մարտավարական դադար» կսկսեն Գազա քաղաքում, Դեյր ալ-Բալահում և Մուվասիում՝ երեք ամենամեծ բնակչություն ունեցող տարածքներում, որպեսզի «մեծացնեն տարածք մտնող մարդասիրական օգնության մասշտաբները»։ Դադարն սկսվում է ամեն օր՝ տեղական ժամանակով ժամը 10:00-ից մինչև 20:00-ն՝ մինչև հետագա ծանուցում՝ սկսած այսօրվանից։

Նշվում է, որ իսրայելցի զինվորականները նաև հայտարարել են, որ կստեղծեն անվտանգ երթուղիներ օգնության մատակարարման համար։

Սննդի մասնագետներն ամիսներ շարունակ զգուշացրել են Գազայում սովի վտանգի մասին, որտեղ Իսրայելը սահմանափակել է օգնությունը, քանի որ պնդում է, թե ՀԱՄԱՍ-ն ապրանքներ է ներմուծում՝ իր իշխանությունն ամրապնդելու համար։

Վերջին օրերին տարածվող՝ Գազայից հյուծված երեխաների լուսանկարներն Իսրայելի հասցեին համաշխարհային քննադատության պատճառ են դարձել, այդ թվում՝ մերձավոր դաշնակիցների կողմից, որոնք կոչ են արել դադարեցնել պատերազմը և դրա հետևանքով առաջացած հումանիտար աղետը։

Կարմիր խաչի միջազգային կոմիտեի (ԿԽՄԿ) նախագահ Միրիանա Սպոլյարիչը խիստ էր արտահայտվել Գազայի հատվածում Իսրայելի գործողությունների հետևանքների վերաբերյալ։ Սպոլյարիչի գնահատմամբ՝ Գազայի խաղաղ բնակչությանն «անխնա սպանում են ռազմական գործողությունների և սնունդ հայթայթելու փորձերի ժամանակ»:

Գազայի շարունակվող պատերազմն սկսվել էր 2023թ. հոկտեմբերի 7-ին: 2025թ. հունվարի 15-ին Իսրայելը և ՀԱՄԱՍ-ը փուլային համաձայնության էին եկել պատերազմը դադարեցնելու վերաբերյալ: Մարտի 18-ի լույս 19-ի գիշերը, սակայն, Իսրայելը վերսկսել էր հարվածները:

2025 թվականի մարտի 2-ից Գազայի հատված մարդասիրական օգնություն չի մատակարարվում, Իսրայելի որոշմամբ՝ փակվել են բոլոր անցակետերը։ Մայիսին, որպես այլընտրանք, հրեական պետությունը, ԱՄՆ-ի աջակցությամբ, պատրաստել էր նոր սխեմա, որը ենթադրում էր Գազայի մարդասիրական օգնության հիմնադրամին (GHF) փաստացի մենաշնորհային իրավունքների փոխանցում սննդի և առաջին անհրաժեշտության ապրանքների բաշխման կենտրոնների կազմակերպման համար:

ՄԱԿ-ի Մարդու իրավունքների գերագույն հանձնակատարի գրասենյակի տվյալների համաձայն՝ հուլիսի 21-ի դրությամբ 1054 մարդ է սպանվել Գազայում իսրայելցի զինվորականների կողմից պարենային օգնություն ստանալու փորձի ժամանակ: Հակամարտության սկզբից  ի վեր զոհերի թիվը հասել է 59 000-ի։