Իրանի միջուկային ներուժը գիտնականների մտքում է, ոչ թե միջուկային օբյեկտներում, ի պատասխան ԱՄՆ նախագահ Դոնալդ Թրամփի հայտարարությունների՝ ասել է Իրանի նախագահ Մասուդ Փեզեշքիանը, փոխանցում է ԻՌՆԱ-ն։
«Մենք պնդում ենք Իրանի միջուկային ծրագրի շարունակման և ուրանի հարստացման վրա՝ միջազգային իրավունքի շրջանակներում»,- հայտարարել է Իրանի նախագահը։
Նա երկրի միջուկային ծրագիրը դադարեցնելու մասին խոսակցությունները որակել է որպես պատրանք։ Փեզեշքիանի խոսքով՝ Թել Ավիվը թաքցնում է իր կորուստները։
«Իրանը պատերազմ չի փնտրում և չի հավատում, որ հրադադարը վերջնական է։ Իրանը կպաշտպանվի ողջ ուժով և չի հանձնվի։ Մենք կենտրոնանում ենք դիվանագիտության և երկխոսության վրա»,- հավելել է նա։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին: Հունիսի 22-ին ԱՄՆ-ն հարվածել էր Իրանում գտնվող երեք միջուկային օբյեկտների՝ Ֆորդոյում, Սպահանում և Նաթանզում։
Հուլիսի 22-ին Թրամփը հայտարարել էր, որ անհրաժեշտության դեպքում ԱՄՆ-ն կրկին կհարվածի Իրանի միջուկային օբյեկտներին։
