Պաղեստինյան ՀԱՄԱՍ շարժման ներկայացուցիչներն ուղիղ բանակցություններ են անցկացնում ԱՄՆ վարչակազմի հետ Գազայի հատվածում հրադադարի վերաբերյալ, հայտնել է ՏԱՍՍ-ը՝ հղում անելով «Ալ Ջազիրա» հեռուստաալիքին։
ԶԼՄ-ի աղբյուրը հայտնել է, որ բանակցություններն «ընթացել են վերջին մի քանի օրերի ընթացքում», պատվիրակությունների կազմը չի հրապարակվել։ Քննարկում են Գազա մարդասիրական օգնության մատակարարումների վերսկսման և հրադադարի հարցերը։
ՀԱՄԱՍ-ը պաշտոնապես չի մեկնաբանել այս հրապարակումը։
Հունվարի 15-ին Իսրայելը և ՀԱՄԱՍ-ը փուլային համաձայնության էին եկել Գազայի հատվածում պատերազմը դադարեցնելու վերաբերյալ:
Փետրվարի սկզբին ԱՄՆ նախագահ Դոնալդ Թրամփը հայտարարել էր, որ ԱՄՆ-ն պատրաստ է ստանձնել Գազայի հատվածի կառավարումը, այդ թվում՝ ականազերծել տարածքը և քանդել ավերված շենքերը: Նրա ծրագրի համաձայն՝ տարածաշրջանը պետք է վերածվի «Միջին Արևելյան Ռիվիերայի»։ Դա ենթադրում է Գազայի բոլոր բնակիչների կամ մեծ մասի վերաբնակեցում այլ երկրներում։ Արաբական հինգ երկրների արտգործնախարարներ քննադատել էին այս առաջարկը: Թրամփը փետրվարի 26-ին հրապարակել էր արհեստական ինտելեկտի միջոցով ստեղծված տեսահոլովակ, որտեղ ցույց էր տալիս Գազայի հնարավոր ապագան՝ համաձայն իր պլանի։
Մարտի 18-ի լույս 19-ի գիշերն Իսրայելը վերսկսել էր հարվածները Գազայում։ Իսրայելի վարչապետ Բենիամին Նեթանյահուն հայտարարել էր, որ հարձակումները շարունակվել են՝ կապված պաղեստինյան ՀԱՄԱՍ շարժման կողմից հրադադարի ռեժիմի երկարաձգման և պատանդների ազատման ամերիկյան ծրագիրը մերժելու հետ:
