Ամենայն Հայոց կաթողիկոս Գարեգին Բ-ն ներկա կգտնվի Հռոմի Ֆրանցիսկոս պապի հուղարկավորությանը, Armenia Today-ին հայտնել է Մայր Աթոռի տեղեկատվական համակարգի տնօրեն Տեր Եսայի քահանա Արթենյանը։
«Ծրագրավորվում է Վեհափառի մասնակցությունը Ֆրանցիսկոս պապի հուղարկավորությանը»,- նշել է նա։
Հռոմի պապի հուղարկավորությունը տեղի կունենա ապրիլի 26-ին։
Նա մահացել էր ապրիլի 21-ին՝ 88 տարեկան հասակում։ Նրան հիվանդանոց էին տեղափոխել փետրվարի 14-ին, երկկողմանի թոքաբորբ էր ախտորոշվել։ Պապի ինքնազգացողությունը վատացել էր փետրվարի 17-ին։
Մարտի 23-ին նրան դուրս էին գրել հիվանդանոցից, ու ավելի քան հինգշաբաթյա ընդմիջումից հետո առաջին անգամ ելույթ էր ունեցել հավատացյալների առաջ։
Հռոմի պապն ապրիլի 20-ին՝ Սուրբ Հարության տոնի իր պատգամում, խոսել էր Հարավային Կովկասի մասին՝ հայտարարելով, որ Հայաստանի ու Ադրբեջանի միջև վաղեմի լարվածությունը հրատապ հաշտեցում է պահանջում։
