Իրանի և Միացյալ Նահանգների ներկայացուցիչները Հռոմում անցկացրել են Թեհրանի միջուկային ծրագրի վերաբերյալ անուղղակի բանակցությունների երկրորդ փուլը, հայտնում է ՏԱՍՍ-ը։
Իրանի արտաքին գործերի նախարար Աբբաս Արաղչիի խոսքով՝ 4 ժամ տևած բանակցությունների ընթացքում պատվիրակությունները ավելի մեծ փոխըմբռնման են հասել մի շարք հարցերի շուրջ։ Արաղչին հայտնել է, որ Վաշինգտոնը դեռևս չի փորձել հատել Թեհրանի «կարմիր գծերը» և չի ձգտել բանակցային օրակարգում ներառել Իրանի միջուկային ծրագրից դուրս հարցեր։
Իրանի արտաքին գործերի նախարարության խոսնակ Էսմայիլ Բաղային բանակցությունները որակել է «օգտակար» և ասել, որ դրանք տեղի են ունեցել «կառուցողական մթնոլորտում»։
Բանակցություններում որպես միջնորդ հանդես եկող Օմանի արտաքին գործերի նախարարությունը հայտարարել է, որ Միացյալ Նահանգները և Իրանը քննարկում են համաձայնագիր, որը թույլ կտա Թեհրանին պահպանել խաղաղ նպատակներով միջուկային էներգիայի զարգացման տարբերակը։
Բանակցությունները պետք է ապահովեն, որ Թեհրանը դադարեցնի միջուկային զենքի մշակումը և վերացնի իր նկատմամբ սահմանված պատժամիջոցները։ Նշվում է, որ ԱՄՆ-ի և Իրանի միջև բարձր մակարդակի բանակցությունների երրորդ փուլը տեղի կունենա Օմանում ապրիլի 26-ին։ Ապրիլի 23-ին կողմերը կանցկացնեն տեխնիկական խորհրդակցություններ։
Ապրիլի 12-ին Իրանի և ԱՄՆ-ի ներկայացուցիչներն Օմանում անուղղակի բանակցություններ էին վարել Իրանի միջուկային ծրագրի շուրջ ստեղծված իրավիճակի վերաբերյալ։ Ըստ լրատվամիջոցների՝ Թեհրանը Վաշինգտոնին հայտնել էր, որ պատրաստ է սահմանափակել ուրանի հարստացումը, եթե իրեն տրվեն հուսալի երաշխիքներ, որ ԱՄՆ նախագահ Դոնալդ Թրամփը կրկին չի հրաժարվի գործարքից։
