Էր Ռիադում ռուս-ամերիկյան բանակցությունները տեղի կունենան առանց այլ երկրների մասնակցության, հայտնել է ՏԱՍՍ-ը՝ հղում անելով ՌԴ նախագահի օգնական Յուրի Ուշակովին։ Նրա խոսքով՝ երկկողմ բանակցություններ են պատրաստվում ամենաբարձր մակարդակով։
«Առայժմ, այս համատեքստում, խոսում ենք երկկողմ բանակցությունների մասին: Մենք, փաստորեն, այդ նպատակով ենք մեկնում Էր Ռիադ»,- պարզաբանել է Ուշակովը:
Նա հավելել է, որ հեռախոսազրույց է ունեցել Սաուդյան Արաբիայում բանակցություններին մասնակցող ամերիկյան պատվիրակության հետ։ Էր Ռիադում ռուս-ամերիկյան բանակցություններին Ուշակովից բացի կմասնակցի նաև ՌԴ արտգործնախարար Սերգեյ Լավրովը։
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 16-ին ԱՄՆ պատվիրակությունը մեկնել էր Սաուդյան Արաբիա՝ ՌԴ ներկայացուցիչների հետ բանակցությունների նպատակով։
