Իսրայելի վարչապետ Բենիամին Նեթանյահուն հայտարարել է, որ երկրի բանակը Գազայի հատվածում կվերսկսի ռազմական գործողությունները, եթե պաղեստինյան ՀԱՄԱՍ շարժումը մինչև փետրվարի 15-ի կեսօր ազատ չարձակի իսրայելցի պատանդներին։
«Իմ կողմից ընդունված և իմ աշխատակազմի կողմից միաձայն հաստատված որոշումը հետևյալն է. եթե ՀԱՄԱՍ-ը չվերադարձնի մեր պատանդներին մինչև շաբաթ օրվա կեսօր, հրադադարը կչեղարկվի, և Իսրայելի պաշտպանության բանակը կվերսկսի ինտենսիվ ռազմական գործողությունները մինչև ՀԱՄԱՍ-ի վերջնական ջախջախումը»,- Նեթանյահուի հայտարարությունը մեջբերել է ՏԱՍՍ-ը։
Գործակալությունը նշում է, որ վարչապետը չի հստակեցրել, թե քանի պատանդ է պահանջում ազատել: Նեթանյահուն հայտնել է, որ ՀԱՄԱՍ-ի՝ պատանդների ազատ արձակման գործընթացը կասեցնելու մասին հայտարարությունից հետո նախորդ գիշեր Իսրայելի բանակին հրաման է տվել ուժերը կենտրոնացնել Գազայի հատվածի ներսում և դրա շուրջ:
Փետրվարի 10-ին ՀԱՄԱՍ-ը հայտարարել էր, որ Իսրայելի կողմից հրադադարի մասին համաձայնագրի խախտումների պատճառով հետաձգել է Գազայի հատվածում պահվող պատանդների նոր խմբի ազատման գործընթացը: Դրանից հետո ԱՄՆ նախագահ Դոնալդ Թրամփը պահանջել էր մինչև փետրվարի 15-ի կեսօր ազատ արձակել բոլոր պահվող պատանդներին՝ հայտարարելով, որ եթե պահանջը չկատարվի, ապա «դժոխք կբռնկվի»։
Հունվարի 15-ին Իսրայելը և ՀԱՄԱՍ-ը փուլային համաձայնության էին եկել Գազայի հատվածում պատերազմը դադարեցնելու վերաբերյալ: Համաձայնագիրը նախատեսում էր հրադադարի նախնական փուլ 6 շաբաթ ժամկետով և ներառում էր Գազայի հատվածից իսրայելական զորքերի աստիճանական դուրսբերում, իսրայելցի պատանդների ազատ արձակում՝ Իսրայելի կողմից պահվող պաղեստինցի բանտարկյալների դիմաց: Պայմանավորվածության առաջին փուլը նախատեսում էր 33 իսրայելցի պատանդների ազատում, ներառյալ՝ բոլոր կանանց, երեխաներին և 50 տարեկանից բարձր տղամարդկանց: Այս փուլում արդեն ազատ է արձակվել 21 պատանդ։
