Ցավալի լուրը, որ Վաշինգտոնում կործանված ինքնաթիռում ռուս գեղասահորդներ և այլ քաղաքացիներ կային, հաստատվում է, հայտարարել է ՌԴ նախագահի մամուլի քարտուղար Դմիտրի Պեսկովը։
«Ցավոք սրտի, մենք տեսնում ենք, որ այս տխուր լուրերը հաստատվում են»,- ասել է նա։
ՏԱՍՍ-ը տեղեկացնում է, որ ինքնաթիռում էին գեղասահքի զուգասահքի աշխարհի չեմպիոններ, Ռուսաստանի հավաքականի նախկին անդամներ Եվգենյա Շիշկովան և Վադիմ Նաումովը։ Ըստ The Wichita Eagle-ի տեղեկությունների՝ ԱՄՆ գեղասահքի պատանեկան հավաքականի անդամները ևս ինքնաթիռում էին և մեկնում էին մրցման:
«ՌԻԱ Նովոստին» հայտնում է, որ կործանված ինքնաթիռում էր գտնվում 8 գեղասահորդ։ Սպորտային գործակալ Արի Զաքարյանն աղբյուրին հայտնել է, որ ինքնաթիռում կային նաև ռուս մարզիչներ, Շիշկովա-Նաումով զույգից բացի՝ ԽՍՀՄ առաջնության չմշկասահքի բրոնզե մեդալակիր Իննա Վոլյանսկայան, ովքեր զբաղվում էին մարզչական գործունեությամբ։
Հունվարի 30-ին American Airlines ավիաընկերության մարդատար ինքնաթիռը և ԱՄՆ բանակի Black Hawk ուղղաթիռը բախվել էին Ռոնալդ Ռեյգան Վաշինգտոնի միջազգային օդանավակայանի մոտ։ Ինքնաթիռը թռչում էր Կանզասից, օդանավում կային 60 ուղևոր և անձնակազմի 4 անդամ, ուղղաթիռում՝ առնվազն 3 զինվորական։ Բախումից հետո ինքնաթիռն ընկել է Պոտոմակ գետը։ Ողբերգության վայրում որոնողափրկարարական աշխատանքներ են իրականացվում։ Լրատվամիջոցների հաղորդմամբ՝ գետից դուրս է բերվել առնվազն 18 մահացածների մարմին, ողջ մնացածների մասին տեղեկություններ չկան։
