Իրանի Արևմտյան Ադրբեջան նահանգի դատարանը երկու ԼԳԲՏ ակտիվիստների՝ 31-ամյա Զառա Սեդիգի Համեդանիին և 24-ամյա Էլհամ Չուբդարին մահապատժի է դատապարտել՝ «երկրի վրա անառակություն տարածելու», «քրիստոնեություն տարածելու» և «Իսլամական Հանրապետությանը հակադրվող լրատվամիջոցների հետ շփումների» համար։ Այս մասին հայտնում է BBC-ն։
Իրավապաշտպանների խոսքով՝ Իրանի պատմության մեջ առաջին մահապատժի դատավճիռները, որոնք կայացվել են կանանց սեռական կողմնորոշման պատճառով, հայտարարվել են Ումրիա քաղաքում։ Այս գործով մեկ այլ մեղադրյալ՝ 52-ամյա Սոհեյլա Աշրաֆին, բանտում սպասում է դատավճռի կայացմանը։
Համեդանին ձերբակալվել էր 2021 թվականի հոկտեմբերի վերջին՝ Թուրքիայի հետ սահմանի մոտ, որտեղ նա փորձել էր ապօրինի մուտք գործել։ Ձերբակալությունից հետո նա մոտ երկու ամիս պահվել է մեկուսարանում։ Կինը զրկվել է փաստաբանի իրավունքից, նաև ենթարկվել է բանավոր վիրավորանքի ու սպառնալիքների։
Amnesty International իրավապաշտպան կազմակերպությունը մատնանշում է, որ դեպքը կապված է ոչ միայն կնոջ կողմնորոշման, այլև սոցիալական ցանցերում ԼԳԲՏ իրավունքների պաշտպանության նրա հայտարարությունների հետ։ Նշվում է նաև, որ Համեդանին նախկինում նկարահանվել է BBC-ի վավերագրական ֆիլմում՝ խոսելով իր հայրենի Իրաքյան Քրդստանում ԼԳԲՏ անձանց իրավունքների ոտնահարման մասին:
BBC-ի փոխանցմամբ՝ Իրանում մահապատիժների թիվը վերջին ժամանակներում կտրուկ աճել է։ Հուլիսի վերջին շաբաթվա ընթացքում այնտեղ կայացվել է 32 մահապատիժ, որոնց թվում եղել է երեք կին։
