Ադրբեջանի ԱԳՆ-ն հայտնել է Լոնդոնում երկրի դեսպանատան վրա մի խումբ անհայտ անձանց կողմից հարձակման մասին։
«Մտնելով դեսպանատան շենք՝ հարձակվողները շենքում վանդալիզմ են իրականացրել․ պատշգամբում կրոնական դրոշներ են կախել, արմատական կրոնական կարգախոսներ են բղավել։ Դեսպանատան աշխատակիցները չեն տուժել»,- ԱԳՆ-ի խոսքերն է մեջբերում ՏԱՍՍ-ը։
Նշվում է, որ ոստիկանների միջամտությունից հետո հարձակվողները վտարվել են դեսպանատան շենքից և բերման են ենթարկվել, միջադեպը հետաքննում են իրավապահ մարմինները։ Արտաքին գործերի նախարարությունը հայտնել է, որ Մեծ Բրիտանիան նախազգուշացվել է դիվանագիտական ներկայացուցչությունների շենքերի անվտանգության ապահովման անհրաժեշտության մասին՝ Վիեննայի կոնվենցիայի համաձայն։
Ադրբեջանական լրատվամիջոցների փոխանցմամբ՝ հարձակման պատասխանատվությունը ստանձնել է «Մահդիի ծառաների միություն շիական ծայրահեղական կազմակերպությունը»։ Նշվում է, որ կազմակերպությունը հիմնադրվել է Լոնդոնում բնակվող քուվեյթյան ծագումով շիա հոգևորականների կողմից: Նշվում է, որ ակցիան իրականացվել է «շիական պետություններից մեկի հատուկ ծառայությունների ազդեցության տակ»։
