Իրանը կրկին հրթիռային հարձակում է իրականացրել Իսրայելի տարբեր թիրախների վրա, ասված է Իսլամական հեղափոխության պահապանների կորպուսի (ԻՀՊԿ) հայտարարության մեջ, փոխանցել է ՏԱՍՍ-ը։
Ըստ հաղորդագրության՝ ԻՀՊԿ-ն երկուշաբթի առավոտյան հրթիռային գործողության 21-րդ ալիքի շրջանակներում մի քանի հրթիռով հարվածել է տարբեր թիրախների։ Այս համատեղ հարվածում օգտագործվել են պինդ վառելիքով և հեղուկ վառելիքով հրթիռներ, ինչպես նաև կամիկաձե անօդաչու թռչող սարքեր։
«Այս հարձակման ընթացքում ԻՀՊԿ-ն փոխել է Թել Ավիվի և Հայֆայի հրետակոծման մարտավարությունը և հարձակվել է հյուսիսից մինչև հարավ գտնվող բազմաթիվ թիրախների վրա»,- ասված է հրապարակման մեջ։
Նշվում է, որ իրանական հրթիռային հարվածներ են հասցվել Թել Ավիվին, Հայֆային, Աշկելոնին, Աշդոդին, Աքրեին, Սաֆեդին և Իսրայելի այլ քաղաքների։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ Պաշտոնական Երևանը դատապարտել էր Իսրայելի միակողմանի հարձակումն Իրանի վրա։ Երկու կողմն էլ հայտնել է զոհերի և բազմաթիվ տուժածների մասին: Հունիսի 22-ի գիշերն ԱՄՆ-ն հարձակվել էր Իրանի երեք միջուկային օբյեկտի վրա։
