Աբովյան խոշորացված համայնքի Առինջ գյուղի բնակիչները Խաչատուր Աբովյան թաղամասի 7-րդ փողոցում բողոքի ակցիա են կազմակերպել՝ պահանջելով դադարեցնել հարևանությամբ կառուցվող բազմաբնակարան շենքի կառուցումը մինչև դատարանի որոշումը։
Նրանց խոսքով՝ համայնքի 58 բնակիչ շինթույլտվություն տալու փուլում բողոք է ներկայացրել, սակայն Աբովյանի համայնքապետ Էդուարդ Բաբայանն արտոնել է կառուցապատող ԷՅ ԷՆ ՔԸՆՍԹՐԱՔՇՆ ՍՊԸ-ին սկսել շինարարությունը։
Ավելի ուշ բնակիչները դատարան են դիմել, սակայն շինարարությունը մինչ դատարանի որոշումը չի դադարեցվել, այլև շարունակվում է՝ իրենց պատճառելով անհարմարություններ։
Բնակիչները բողոք են ներկայացրել իրենց պարզաբանմամբ ապօրինի կերպով տարածքում բազմաբնակարան շենք կառուցելու համար։
«Եթե 58 մարդու ստորագրություն անտեսել են, իմ պատի հետևը շենք են սարքում, կտրում են իմ լուսավորությունը, ապա պետք է փոխհատուցեն։ Ես այստեղ խնամքի կենտրոն ունեմ։ Ինքս Հոլանդիայի բնակիչ եմ, ինչո՞ւ պետք է գամ Հայաստան ու ընկնեմ նման բաների հետևից»,- ասել է քաղաքացին։
Ընկերության ներկայացուցիչ Երեմ Ասատրյանը լրագրողներին հայտնել է, որ չի տեսնում դատավարության ընթացքում ճանապարհ փակելու անհրաժեշտություն։
«Կառուցապատողն ունի թույլտվություն և քանի դեռ այդ թույլտվությունն իրավաչափ է, դատարանի որոշմամբ կամ իրավասու մարմնի որոշմամբ անվավեր ճանաչված չէ, կառուցապատողն անում է աշխատանք։ Ավելին՝ եթե չաներ, շինթույլտվությամբ ժամկետ կա սահմանված, հետագայում տույժեր և տուգանքների առաջ կկանգներ»,- նշել է նա։
Մանրամասները՝ տեսանյութում։
