Իրանի ԱԳ նախարար Աբբաս Արաղչին հայտնել է, որ Թեհրանը, ԱՄՆ-ի հետ բանակցությունների շրջանակներում, կարող է համաձայնվել սահմանափակել ուրանի հարստացման մակարդակը կամ դրա ծավալները, բայց մտադիր չէ ամբողջությամբ հրաժարվել այս տեխնոլոգիայից,- հայտնել է ՏԱՍՍ-ը՝ հղում անելով Իրանի պետական հեռուստատեսությանը՝ IRIB-ին։
«Մեր կարծիքով՝ ուրանի հարստացման թեման քննարկման ենթակա չէ, այն կշարունակվի։ Այս թեմայով որևէ ենթադրություն չի կարող լինել։ Ուրանի հարստացման մակարդակի կամ ծավալի վերաբերյալ որոշ սահմանափակումներ հնարավոր են վստահությունն ամրապնդելու համար»,- ասել է նա IRIB-ին՝ Մասկատում ԱՄՆ-ի հետ խորհրդակցություններից հետո։
Արաղչին նշել է, որ պատժամիջոցների շուրջ երկու երկրների միջև համաձայնություն է ձեռք բերվել։
«Նույնը վերաբերում է նաև պատժամիջոցների չեղարկման հարցին, սա բանակցությունների հիմքն է։ Այս հարցի շուրջ երկու կողմերի միջև համաձայնություն է ձեռք բերվել։ Այն դիրքորոշումները, որոնց վերաբերյալ տարաձայնություններ կային, որոշ չափով մոտեցել են»,- հավելել է նա։
Մայիսի 9-ին Արաղչին հաստատել էր, որ Իրանի և ԱՄՆ-ի միջև Իրանի միջուկային ծրագրի շուրջ անուղղակի բանակցությունների չորրորդ փուլը տեղի կունենա մայիսի 11-ին՝ Օմանում:
Իրանն ու ԱՄՆ-ն ապրիլի 12-ին, 19-ին և 26-ին Օմանի միջնորդությամբ բանակցությունների երեք փուլ էին անցկացրել Մասկատում և Հռոմում ՝ իրանական միջուկային ծրագրի շուրջ համաձայնության հասնելու և Թեհրանի նկատմամբ պատժամիջոցները չեղարկելու նպատակով:
Մայիսի 3-ին նախատեսված անուղղակի բանակցությունների չորրորդ փուլը հետաձգվել էր պատվիրակությունների ծրագրերի անհամապատասխանության պատճառով։
