Այսօր՝ հոկտեմբերի 11-ին, Արցախի մայրաքաղաք Ստեփանակերտում մեկնարկել է «Համագործակցություն հանուն արդարության և խաղաղության» խորագրով Արցախի բարեկամների համաժողով։
Համաժողովին մասնակցում է նաև ԱՀ նախագահ Բակո Սահակյանը, ԱԳ նախարար Մասիս Մայլիյանը, ՀՀ ԱԳ փոխնախարար Շավարշ Քոչարյանը, Արցախի բարձրագույն քաղաքական ղեկավարությունը, ինչպես նաև քաղաքական, հասարակական, մշակութային գործիչներ, իրավապաշտպաններ, գիտնականներ, վերլուծաբաններ և լրագրողների տարբեր երկրներից։ Միջոցառման շրջանակներում ԱՀ նախագահը հանդես է եկել ելույթով։
Ողջունելով ներկաներին և հյուրերին՝ Բակո Սահակյանը նշել է, որ այսօրվա միջոցառումը բավականին յուրահատուկ է թե՛ իր բովանդակությամբ, թե՛ մասնակիցների առումով:
«Առաջին անգամ տեղի է ունենում Արցախի բարեկամների համաժողով, որը մեկ հարկի տակ է հավաքել մեր երկրին սատարող քաղաքական, հասարակական, մշակութային գործիչների, իրավապաշտպանների, գիտնականների, վերլուծաբանների և լրագրողների՝ տարբեր պետություններից: Այստեղ են Արցախի հետ բարեկամության խմբերի և շրջանակների անդամներ, մեր հանրապետության անկախությունը ճանաչած կամ մեզ հետ համագործակցող վարչական միավորների և քաղաքական ուժերի ներկայացուցիչներ»,- նշել է Բակո Սահակյանը։
Բակո Սահակյանի խոսքով՝ ժողովրդավարական սկզբունքներին և մարդասիրական արժեքներին նվիրվածությամբ համաժողովի մասնակիցները տարիներ շարունակ քրտնաջան աշխատանք եք տանում՝ ուղղված Արցախի սատարմանը, միջազգային տարբեր հարթակներում Արցախի մասին ճշմարտացի տեղեկատվության ներկայացմանը, երկկողմ հարաբերությունների զարգացմանը, Արցախում տարբեր ծրագրերի իրականացմանը:
«Մենք շնորհակալ ու երախտապարտ ենք ձեզ այս ամենի համար, բարձր ենք գնահատում ձեր առաքելությունը և ուրախ ենք, որ ունենք ձեզ նման ընկերներ ու բարեկամներ»,- նշել է Բակո Սահակյանը։
ԱՀ նախագահը նշել է, որ համաժողովում քննարկվելիք թեմաներն առնչվում են Արցախի կենսագործունեության գրեթե բոլոր ոլորտներին, և նման ձեւաչափը հնարավորություն է տալիս ավելի լավ պատկերացնել իրականությունը, նախանշել ու հստակեցնել անելիքները:
Բակո Սահակյանը մասնակիցներին ներկայացրել է ԱՀ պետականաշինության տեսլականը և արտաքին քաղաքական հրամայականները։
«Անկախ, ինքիշխան, հզոր պետություն կերտելը մեզ համար եղել և մնում է մեր պետականաշինության հիմքը, որի հիմնասյուներից են Հայաստանի և Սփյուռքի հետ մեր եռամիասնությունն ու ժողովրդավարական արժեքներին ու սկզբունքներին հավատարիմ լինելը»,- նշել է Բակո Սահակյանը։
Բակո Սահակյանն ընդգծել է, որ կարևորագույն հրամայական է Արցախի անվտանգության լիարժեք ապահովումը բոլոր հարթություններում:
«Մեր անվտանգության չնչին իսկ թուլացումը հակառակորդի մոտ առաջացնելու է նոր ագրեսիայի դիմելու գայթակղություն, ինչն ինքնին հղի է անկանխատեսելի հետևանքներով: Այդ իսկ պատճառով՝ անվտանգության խնդիրներն առաջնային են նաև բանակցային գործընթացում»,- նշել է Բակո Սահակյանը։
Բակո Սահակյանն անդրադարձել է բանակցային գործընթացին՝ վերահաստատելով, որ Արցախը կողմնակից է Ադրբեջանի հետ հարաբերությունների խաղաղ կարգավորմանը՝ բանակցային սեղանի շուրջ՝ ԵԱՀԿ Մինսկի խմբի հովանու ներքո:
«Այստեղ լուրջ հաջողությունների գրանցումն անհնարին է առանց բանակցային գործընթացի լիարժեք ձևաչափի վերականգնման՝ Արցախի լիիրավ մասնակցությամբ: Ակնհայտ է, որ Արցախի ճակատագիրը չի կարող որոշվել առանց նրա մասնակցության, և մեզ համար չի կարող լինել վերադարձ անցյալին՝ լինի դա կարգավիճակի թե սահմանների առումով»,- ընդգծել է Բակո Սահակյանը։
ԱՀ նախագահը վերահաստատել է, որ Արցախի Հանրապետության արտաքին քաղաքականության հիմքում շարունակում է մնալ հավասարակշռվածության և բազմաուղղվածության սկզբունքները:
«Մեզ համար հրամայական է հավասարապես բարիդրացիական հարաբերությունների պահպանումը ինչպես Եվրոպայի, ԱՄՆ-ի, Ռուսաստանի, այնպես էլ տարածաշրջանային պետությունների հետ: Դա պայմանավորված է ինչպես մեր տարածաշրջանի յուրահատկությամբ, այնպես էլ հայկական սփյուռքի առկայությամբ:
Արտաքին քաղաքական ասպարեզում պաշտոնական Ստեփանակերտը շարունակելու է հատուկ տեղ հատկացնել տարբեր երկրների ու պետությունների և նրանց վարչական միավորների հետ կապերի հաստատմանն ու խորացմանը»,- նշել է ԱՀ նախագահը։
Բակո Սահակյանը նշել է, որ յուրաքանչյուր ժամանակահատված առաջադրում է նոր խնդիրներ, պահանջում է տարբեր մարտահրավերների դիմակայելու ռազմավարության և մարտավարության հստակեցում ու ճշգրտում: Այստեղ առանցքային դերակատարություն ունի Հայաստան-Արցախ-Սփյուռք սերտ փոխգործակցությունը, Արցախի և նրա բարեկամների միջև մշտական գործնական կապերի ամրապնդումը:
«Անելիքներն ու խնդիրները բազմազան են, բայց միանգամայն իրատեսական: Համոզված եմ, որ մեզ հաջողվելու է արդյունավետորեն լուծել դրանք, և այս ճանապարհին հատուկ նշանակություն ունի նման միջոցառումների անցկացումը:
Համաժողովին մաղթում եմ արդյունավետ աշխատանք, նրա մասնակիցներին՝ քաջառողջություն, հաջողություններ ու ամենայն բարիք»,- եզրափակել է Բակո Սահակյանը։
