Իսպանական «Ռեալ Սոսյեդադի» հայազգի կիսապաշտպան Արսեն Զախարյանը Լա լիգայի ընթացիկ մրցաշրջանում վնասվածք է ստացել, հայտնում է «ՌԻԱ Նովոստի»-ն։
Փետրվարի 23-ին Զախարյանն այս մրցաշրջանում իր առաջին խաղն է անցկացրել «Ռեալ Սոսյեդադի» մեկնարկային կազմում՝ Իսպանիայի առաջնության 25-րդ տուրում, որում թիմը հաղթել է 3:0 հաշվով: Նա 12-րդ րոպեին «Լեգանեսի» դեմ խաղում բացել է հաշիվը։ Գոլը կիսապաշտպանի համար առաջինն էր 2024/25 մրցաշրջանում, սակայն նա փոխարինվել է ընդմիջմանը։
Ինչպես «ՌԻԱ Նովոստի»-ին հայտնել է Զախարյանի ներկայացուցիչ Գենադի Գոլուբինը, խաղացողն ազդրի առջևի հատվածում սպազմ է ունեցել, և փոխարինումը կատարվել է կանխարգելման նպատակով՝ կրկնվող վնասվածքից խուսափելու համար։ Ֆուտբոլիստի մոտ բուժզննումից հետո ախտորոշվել է ազդրի ուղիղ մկանի վնասվածք։ Զախարյանի խաղադաշտ վերադառնալը կախված կլինի վնասվածքի բնույթից և բուժման առաջընթացից: Նախկինում մի շարք վնասվածքների պատճառով նա էր բաց թողել մրցաշրջանի առաջին կեսը և խաղադաշտ դուրս եկել միայն փետրվարի սկզբին։
21-ամյա Զախարյանը «Ռեալ Սոսյեդադի» հետ պայմանագիր էր կնքել 2023 թվականի օգոստոսին՝ 13 մլն եվրոյով Մոսկվայի «Դինամոյից» տեղափոխվելուց հետո։ Ակումբի հետ պայմանագիրը նախատեսված է մինչև 2029 թվականի հունիս։
