Մինսկում տեղի է ունեցել Բելառուսի առաջին հայկական եկեղեցու օծման արարողությունը, հայտնում է BELTA-ն:
Սուրբ Գրիգոր Լուսավորչի անունը կրող եկեղեցու օծման կարգը գլխավորել է Ամենայն Հայոց կաթողիկոս Գարեգին Բ-ն։
Ավելի ուշ ԱԺ նախկին պատգամավոր, Հայաստանի ազգային օլիմպիական կոմիտեի նախագահ Գագիկ Ծառուկյանի խոսնակ Իվետա Տոնոյանը տեղեկացրել է, որ օծման արարողությանը մասնակցել է նաև Ծառուկյանը՝ ընտանիքի հետ։
Ծառուկյանն իր խոսքում ընդգծել է, որ եկեղեցին դառնալու է հայ համայնքի հոգևոր կենտրոնը։
«Բելառուսում և Մինսկում կա հայկական լավ համայնք։ Մեր հայրենակիցները այստեղ ապրում են, աշխատում են, սովորում են, ընտանիքներ են կազմում։ Նրանց բոլոր իրավունքները պաշտպանված են, իրենց չեն զգում օտարության մեջ։ Համայնքի ներկայացուցիչները որոշ ժամանակ առաջ դիմել էին ինձ՝ խնդրանքով, որ ես էլ դիմեմ Բելառուսի նախագահին՝ համապաստախան հողհատկացման և թույլտվությունների համար։ Եվ Բելառուսի նախագահը անմիջապես արձագանքեց, իջեցրեց հանձնարարություն, և այսօր մենք այս եկեղեցու բացումն ենք անում»,- հավելել է Ծառուկյանը։
Ճարտարապետ Սամվել Սահակյանի նախագծով տաճարի շինարարությունն սկսվել է 2022 թվականի օգոստոսին և ավարտվել 2025 թվականի ապրիլին։
