«Լրագրողներ առանց սահմանների» կազմակերպության կողմից հրապարակված մամուլի ազատության համաշխարհային վարկանիշային աղյուսակում Հայաստանը մեկ տարվա ընթացքում բարձրացել է 9-ը հորիզոնականով և այժմ 180 երկրների շարքում զբաղեցնում է 34-րդ տեղը՝ վստահորեն առաջ անցնելով տարածաշրջանային հարևաններից և նույնիսկ Միացյալ Նահանգներից։ Ինդեքսը հրապարակված է կազմակերպության կայքում։
«Չնայած բազմակարծիք միջավայրին, լրատվամիջոցները մնում են բևեռացված։ Երկիրը բախվում է աննախադեպ մակարդակի ապատեղեկատվության և ատելության խոսքի, որը խթանվում է ներքին քաղաքական լարվածությամբ, սահմանային անվտանգության հետ կապված մտահոգություններով և Ռուսաստանի ու Եվրամիության միջև երկրի դժվարին դիրքով»,- գրում է կազմակերպությունը Հայաստանի մասին 2025 թվականի ինդեքսի իր բացատրության մեջ։
Միևնույն ժամանակ՝ կազմակերպությունն ընդգծում է, որ ոչ մի հայ լրագրող չի սպանվել կամ բանտարկվել իր աշխատանքի համար։
Ադրբեջանը 180 երկրների շարքում զբաղեցրել է 167-րդ տեղը, Թուրքիան՝ 159-րդը, Իրանը՝ 176-րդը, իսկ Վրաստանը՝ 114-րդը (տարածաշրջանում գրանցել է ամենավատ անկումը՝ 11 հորիզոնականով՝ խմբ․): Վարկանիշի առաջատարներն են Նորվեգիան, Էստոնիան և Նիդերլանդները։
2024 թվականի մայիսին «Լրագրողներ առանց սահմանների» կազմակերպությունը հայտնել էր, որ Հայաստանում քաղաքական ուժերի բևեռացումը հանգեցրել է լրատվամիջոցների բևեռացման, ինչի արդյունքում երկրում լրագրողները հետապնդվում են։
«Լրագրողներ առանց սահմանների» կազմակերպության զեկույցներում Հայաստանը 2022 թվականին զբաղեցրել էր 51-րդ տեղը, իսկ 2023-ին՝ 49-րդ։ Freedom House-ը 2024 թվականի ապրիլին Հայաստանի ազգային ժողովրդավարական կառավարման վարկանիշը 2,5 կետից իջեցրել էր 2,25-ի՝ պայմանավորված գործադիր իշխանության ամրապնդմամբ։
