Սեպտեմբերի 26-ից Wizz Air ավիաընկերությունն սկսել է իրականացնել Հռոմ-Երևան-Հռոմ չվերթները։ Այս մասին հայտնում են «Արմենիա» միջազգային օդանավակայաններ ՓԲԸ-ից։
Նշվում է, որ չվերթեր կիրականացվեն շաբաթական երկու անգամ՝ երկուշաբթի և ուրբաթ օրերին։
«Ավիատոմսերի գնման և առկայության, ինչպես նաև լրացուցիչ տեղեկությունների համար խորհուրդ ենք տալիս այցելել ավիաընկերության կայքը wizzair.com կամ դիմել տեղական տուրիստական գործակալություններին»,- ասվում է հաղորդագրության մեջ։
Wizz Air-ը հունգարական բյուջետային ավիաընկերություն է, որի կենտրոնակայանը գտնվում է Բուդապեշտում: Այն հիմնադրվել է 2003 թվականի սեպտեմբերին։ Ավիաընկերությունն իր հաշվեկշռում ունի 123 ինքնաթիռ։
