Հայաստանում կկառուցվի 500 մլն դոլար արժողությամբ AI տվյալների կենտրոն՝ արհեստական բանականության ամպային հարթակ ստեղծելու համար, հայտնում է Firebird ընկերությունը։
Ծրագիրն իրականացվում է ՀՀ կառավարության և NVIDIA-ի հետ համագործակցաբար։ Նշվում է, որ կտեղակայվեն հազարավոր NVIDIA Blackwell GPU-ներ, կձևավորվի ավելի քան 100 մեգավատտ հզորությամբ ենթակառուցվածք, որի գործարկումը նախատեսվում է 2026 թվականին։
Հայաստանում արհեստական բանականության ենթակառուցվածքների զարգացմանը կաջակցեն Team Group-ը՝ Telecom Armenia-ի մայր ընկերությունը և իռլանդական Imagine Broadband-ը: Afeyan Foundation For Armenia հիմնադրամը կմիանա Firebird-ին որպես հիմնադիր ներդրող, իսկ նրա ղեկավար Նուբար Աֆեյանը, ով նաև Flagship Pioneering-ի գործադիր տնօրենն է, հանդես կգա որպես Firebird-ի ռազմավարական խորհրդատու և հիմնադիր գործընկեր:
Ըստ հաղորդագրության՝ Firebird-ը և Հայաստանի կառավարությունը հիմք են դնում տարածաշրջանում տեխնոլոգիաների զարգացման համար՝ թույլ տալով ընկերություններին և ձեռնարկատերերին օգտագործել AI-ի ընձեռած նոր հնարավորությունները և աջակցելով տնտեսական աճին Հայաստանում և ամբողջ Կովկասում: Ամրապնդվում են կապերը Եվրոպայի առաջատար տեխնոլոգիական ոլորտների հետ
Firebird.ai Սան Ֆրանցիսկոյում և Երևանում տեղակայված արհեստական բանականության ամպային ընկերությունը 2026 թվականին կգործարկի Կովկասում առաջին և ամենամեծ արհեստական ինտելեկտի գերհամակարգիչը՝ հիմնված NVIDIA Blackwell գրաֆիկական պրոցեսորների վրա:
