ՀՀ գլխավոր դատախազությունը Կադաստրի կոմիտեի դեմ հայց է ներկայացրել՝ պահանջելով անվավեր ճանաչել Երևանի Նաիրի Զարյան փողոցում գտնվող շինության նկատմամբ Լեռնային Ղարաբաղի Հանրապետության կառավարության սեփականության իրավունքի պետական գրանցումը, տեղեկանում ենք Դատական տեղեկատվական համակարգի՝ Datalex.am կայքից։
Նշենք, որ խոսքը Զարյան 17Ա հասցեում գտնվող՝ ՀՀ Արցախի մշտական ներկայացուցչության շենքի մասին է։ Դատախազության հայցը դատարանը մուտքագրել է հուլիսի 15-ին։
Հայաստանում Արցախի ներկայացուցչությունը 2008‑ից գործում է Զարյան փողոցի շենքում։ 2023 թվականին Արցախի նկատմամբ Ադրբեջանի հարձակման հետևանքով արցախցիների բռնի տեղահանումից հետո ներկայացուցչության շենքում են գործում ԱՀ պետական մարմինները, այն ծառայում է նաև որպես ԱՀ պետնախարարի նստավայր։
2025-ի ապրիլին արցախցի փաստաբան Ռոման Երիցյանը հերքել էր տեղեկությունը, թե ներկայացուցչության շենքն անցել է ՀՀ կառավարության տնօրինմանը։ Փաստաբանը նաև հերքել էր լուրը, թե 5 տարի առաջ Արցախի նախկին նախագահ Արայիկ Հարությունյանը շենքը 800 հազար դոլարով գրավադրել էր «Արցախբանկում»։
