Իրանի արտաքին գործերի նախարար Աբբաս Արաղչին, որը Մոսկվա է ժամանել նախագահ Վլադիմիր Պուտինի հետ հանդիպման, նրան կհանձնի Իրանի գերագույն առաջնորդ այաթոլլա Ալի Խամենեիի նամակը, որում նա խնդրում է աջակցել Թեհրանին ԱՄՆ-ի կողմից միջուկային օբյեկտներին հարվածներից հետո, հայտնում է Reuters-ը՝ հղում անելով իր աղբյուրներին։
Զրուցակիցների խոսքով՝ իրանական կողմը «դեռ տպավորված չէ» Ռուսաստանի աջակցությամբ ընթացող իսրայելական գործողության և ամերիկյան հարձակման համատեքստում և կցանկանար, որ Պուտինն «ավելին աներ»։ Նրանք չեն մանրամասնել, թե ինչպիսի օգնության վրա է հույսը դնում Թեհրանը։
Նախագահի մամուլի քարտուղար Դմիտրի Պեսկովը լրագրողներին ասել է, որ Պուտինի և Արաղչիի բանակցությունների թեման «չափազանց պարզ է»։ Հարցին, թե ի՞նչ է Ռուսաստանը պատրաստ անել Իրանի համար, նա պատասխանել է. «Ամեն ինչ կախված է նրանից, թե ինչ է անհրաժեշտ Իրանին»։
«Մենք առաջարկել ենք մեր միջնորդական ջանքերը, կոնկրետ նշել ենք մեր դիրքորոշումը, սա նույնպես շատ կարևոր է։ Սա իրանական կողմին աջակցություն է», – հավելել է Պեսկովը։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ Պաշտոնական Երևանը դատապարտել էր Իսրայելի միակողմանի հարձակումն Իրանի վրա։ Երկու կողմն էլ հայտնել է զոհերի և բազմաթիվ տուժածների մասին: Հունիսի 22-ի գիշերն ԱՄՆ-ն հարձակվել էր Իրանի երեք միջուկային օբյեկտի վրա։
