Որոշումն ընդունված է․ Սուրբ Սոֆիայի տաճարը կվերածվի մզկիթի․ թուրք լրագրող

Թուրքիայի բարձրագույն վարչական դատարանը Սուրբ Սոֆիայի տաճարը մզկիթի վերածելու որոշում է կայացրել։ Այս մասին Twitter-ի իր միկրոբլոգում գրել է թուրք լրագրող Ռագըփ Սոյլուն՝ հղում կատարելով կառավարությունում սեփական աղբյուրին։

«Թուրք լրագրողները, ըստ կառավարության աղբյուրների, պնդում են, որ վարչական դատարանը միաձայն որոշել է Սուրբ Սոֆիայի տաճարը մզկիթի վերածել՝ չեղյալ հայտարարելով 1934 թվականի նախարարների կաբինետի որոշումը»,- ասվում է հրապարակման մեջ։

Որոշումը պաշտոնապես կհրապարակվի հուլիսի 10-ին։

Ermenihaber-ի փոխանցմամբ՝ երկրի ընդդիմադիր քաղաքական ուժերը ևս չեն պատրաստվում դեմ արտահայտվել այդ որոշմանը։

Հիշեցնենք, որ գրեթե 1000 տարի քրիստոնեական Բյուզանդիայի գլխավոր տաճար ծառայած Սուրբ Սոֆիան մզկիթի է վերածել օսմանյան սուլթան Մեհմեթ Ֆաթիհը 1453-ին՝ Բյուզանդիայի մայրաքաղաք Կոստանդնուպոլիսը գրավելուց հետո։ 1930-ին 4 տարով փակվելուց հետո Թուրքիայի Հանրապետության հիմնադիր նախագահ Մուստաֆա Քեմալ Աթաթուրքի նախաձեռնությամբ վերածվել է թանգարանի։ Սակայն ներկայիս Թուրքիայի իշխող կուսակցությունը և նախագահ Ռեջեփ Թայիփ Էրդողանը վերջին տարիներին պարբերաբար օրակարգ են բերում տաճարը կրկին մզկիթի վերածելու հարցը։