Երևանի քաղաքապետարանի աշխատակիցները «Դալմա Գարդեն Մոլի» շենքի ճակատային հատվածից հեռացրել են «Տաշիր» ընկերությունների խմբի նախագահ, գործարար Սամվել Կարապետյանի լուսանկարով և «Ազատություն Սամվել Կարապետյանին» գրությամբ պաստառները: Դեպքի վայրում հերթապահություն են իրականացրել ոստիկանության աշխատակիցներ, այդ թվում՝ հատուկ նշանակության ջոկատայիններ: Armenia Today-ի YouTube-յան ալիքը ուղիղ հեռարձակել է գործողությունը:
«Դալմա Գարդեն Մոլի» ներկայացուցիչ Վարդան Ալոյանն իրավապահ մարմիններին կոչ է արել դադարեցնել տարածք ներխուժելը և տարածքից հեռացնել տեխնիկան և քաղաքապետարանի աշխատակիցներին: Ի պատասխան՝ ոստիկանությունը հայտարարել է, որ իրենց գործողությունները կարող են բողոքարկվել համապատասխան մարմիններում, բայց նրանք պահպանում են հասարակական կարգը և չեն խանգարի քաղաքապետարանի աշխատակիցների կողմից պաստառների անարգել ապամոնտաժմանը:
Որպես ապամոնտաժման հիմք՝ քաղաքապետարանի ներկայացուցիչ Արմեն Առաքելյանը հղում է կատարել Երևանի ավագանու 2009 թվականի նոյեմբերի 18-ի թիվ 37-Ն որոշմանը՝ նշելով, որ տվյալ պաստառները համարվում են գովազդային։ Ավելի վաղ Ալոյանը բացատրել էր, որ այս հիմքը կիրառելի է միայն այն դեպքերում, երբ և՛ գովազդը, և՛ գովազդային կրիչը միաժամանակ անօրինական են։
Ալոյանի խոսքով՝ քաղաքապետարանի գործողություններն անօրինական են, քանի որ նա «փորձում է ապամոնտաժել գովազդ չհանդիսացող նյութը՝ հիմնվելով գովազդի նկատմամբ կիրառելի կանոնների վրա»։ Նա պարզաբանել է, որ շենքի ճակատային մասում տեղադրված պաստառները գովազդային համարվել չեն կարող։
«Նշեք՝ ի՞նչն է գովազդվում»,- ասել է Ալոյանը։
Վանաձորի նախկին քաղաքապետ Մամիկոն Ասլանյանն ընդգծել է, որ նախկինում հետևել է քաղաքի տարբեր հատվածներում «Ազատություն Սամվել Կարապետյանին» գրությամբ պաստառների ապամոնտաժումներին և չի կարողացել անտարբեր մնալ: Նա ապամոնտաժումն անվանել է օրենքի խախտում: Ասլանյանի խոսքով՝ այս ամբողջ իրավիճակն ուղղված է օրինականության, սահմանադրականության, պետականության և ազգայնության վերջին հետքերի վերացմանը։
«Այն, ինչ այսօր կատարվում է Կարապետյանի հետ կապված, համարում եմ պաթոլոգիկ վախի և անօրինականության ամենամեծ դրսևորում։ Ասենք՝ նկարը հանեցիք, անունը ջնջեցիք, ՀԷՑ-ը (սեփականատեր՝ Սամվել Կարապետյան) խլեցիք, իր կատարած գործերն ի՞նչ եք անելու»,- ասել է նա։
Ասլանյանը հայտարարել է, որ «Հայաստանում տեղի են ունենում սարսափելի ոտնձգություններ, որոնք տանում են դեպի իրավական նիհիլիզմ, քաոս, անդունդ»։
Հունիսի 25-ին Հյուսիսային պողոտայում քաղաքապետարանի աշխատակիցներն ապամոնտաժել էին Կարապետյանին ազատ արձակելու կոչով էկրանները։ Ընդ որում՝ ապամոնտաժումը տեղի էր ունեցել սեփականատիրոջ տարածքում, որտեղ էկրանները տեղադրվել էին օրինական հիմունքներով։ Այդ ժամանակ Ալոյանն Armenia Today-ին հայտնել էր, որ քաղաքապետարանի աշխատակիցներն զբաղվել են ապամոնտաժմամբ, երբ իրենք հրաժարվել են հեռացնել պաստառի բովանդակությունը։ Երևանի քաղաքապետարանից ապամոնտաժումը 2024-ի հունվարին ուժի մեջ մտած նոր կարգավորումներին չհամապատասխանելու հանգամանքով էին պատճառաբանել։
Հունիսի 19-ին դատարանը երկու ամսով կալանավորել էր Կարապետյանին, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
