ԵՄ-ն 270 միլիոն եվրո կհատկացնի Հայաստանին՝ 2024-2027 թվականների տնտեսական կայունության և աճի ծրագրի շրջանակներում, ՀՀ արտգործնախարար Արարատ Միրզոյանի հետ համատեղ Երևանում կայացած մամուլի ասուլիսում հայտարարել է Եվրոպական դիվանագիտության ղեկավար Կայա Կալլասը։
Նրա խոսքով՝ աջակցությունը նպատակ ունի օգնել բիզնեսին, բարեփոխումներին և բարելավել Հայաստանի ու ԵՄ-ի միջև փոխգործակցությունը։ Կալլասն ընդգծել է, որ երկու կողմերի միջև կա քաղաքական համաձայնություն։
«ԵՄ-ն և Հայաստանը երբեք այսքան մոտ չեն եղել, որքան հիմա։ ԵՄ-ն պատրաստ է խորացնել համագործակցությունը։ Մեր հարաբերությունները չեն սահմանափակվում միայն տնտեսական ոլորտով։ Մենք նաև սոցիալական, հոգեբանական և բնակարանաշինության նպատակով աջակցություն ենք ցուցաբերում Արցախից ներքին տեղահանված անձանց։ Ժողովուրդների միջև շփումները կարևոր դեր են խաղում մեր հարաբերություններում, ուստի մենք երկխոսություն ենք զարգացնում վիզաների ազատականացման շուրջ»,- բացատրել է եվրոպացի դիվանագետը։
Կալլասը նշել է, որ Եվրոպական հանձնաժողովն ընդունել է վիզաների ազատականացման գործողությունների ծրագրի վերաբերյալ Հայաստանի առաջարկը, և երբ պայմանները բավարարվեն և գործընթացն ավարտվի, դա ԵՄ-ին և Հայաստանին ավելի կմերձեցնի։
2024 թվականի հունիսի 21-ին Հայաստանի խորհրդարանը լսումներ էր անցկացրել ԵՄ անդամակցության հայտի հանրաքվեի վերաբերյալ՝ հետևելով «Ժողովրդավարական ուժերի հարթակ» նախաձեռնող խմբի առաջարկին, որը հոկտեմբերի վերջին հայտարարել էր, որ հանրաքվեի համար անհրաժեշտ 50 հազար ստորագրության փոխարեն հավաքվել է 60 հազար ստորագրություն։
Ազգային ժողովը մարտի 26-ին ամբողջությամբ ընդունել էր ԵՄ-ին ՀՀ անդամակցության մասին օրինագիծը: ՀՀ վարչապետ Նիկոլ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
