Հայաստանի և Հնդկաստանի միջև երկկողմանի համագործակցությունն անվտանգության և պաշտպանության ոլորտում շարունակաբար ընդլայնվում է, Համաշխարհային հարցերով հնդկական խորհրդում (ICWA) հայտարարել է ՀՀ ԱԳ նախարար Արարատ Միրզոյանը։
«Մենք ողջունում ենք մեր պաշտպանության նախարարությունների միջև կայացած առաջին խորհրդակցությունները և համոզված ենք, որ ռեզիդենտ ռազմական կցորդների նշանակումը կարևոր քայլ է այս կենսական ոլորտում խորացված համագործակցության զարգացման ուղղությամբ»,- նշել է նա:
Միրզոյանը շեշտել է, որ Հայաստանն և Հնդկաստանն ունեն բազմաշերտ համագործակցություն, որը «շարունակում է դինամիկ կերպով զարգանալ»:
«Հնդկաստանի հետ գործընկերության համապարփակ խորացումը Հայաստանի արտաքին քաղաքականության առաջնահերթություն է, և մենք այս հարաբերություններին նայում ենք երկարաժամկետ տեսանկյունից»,- ասել է ՀՀ արտաքին գերատեսչության ղեկավարը:
Միրզոյանն իր ելույթում անդրադարձել է նաև Հայաստանի և Ադրբեջանի միջև տարվող բանակցություններին։ Նա շեշտել է, որ ՀՀ կառուցողական մոտեցումը լիովին չի փոխադարձվում Ադրբեջանի կողմից և առաջ են քաշվում նարատիվներ, որոնք ենթադրում են ինքնիշխան Հայաստանի Հանրապետության դեմ տարածքային պահանջներ։
Նախարարը խոսել է նաև պահվող անձանց ազատ արձակման խնդրի մասին։ «Մինչ մենք խոսում ենք այստեղ, Ադրբեջանում կամայականորեն կալանավորված 23 հայերի նկատմամբ բեմադրված դատավարություններ են տեղի ունենում՝ անտեսելով մարդու իրավունքների չափանիշները և պատշաճ դատական գործընթացը։ Ամբողջական կարգավորման և տևական խաղաղության հասնելու համար անհրաժեշտ է հասարակություններին պատրաստել հաշտեցման. չլուծված հումանիտար խնդիրները կարող են միայն խանգարել այդ գործընթացին»,- ասել է նա։
2024-ի փետրվարի 2-ին ՀՀ պաշտպանության նախարար Սուրեն Պապիկյանը Հնդկաստանին և Ֆրանսիային զենքի մատակարարման ոլորտում Հայաստանի հիմնական գործընկերներից էր համարել։ Հնդկաստանի պաշտպանության նախարարության տվյալներով՝ 2024-2025թթ․ ֆինանսական տարվա սկզբին Հնդկաստանից Հայաստան սպառազինության ընդհանուր ներմուծումը հասել էր 600 միլիոն դոլարի։ Փետրվարի 3-ին Հնդկաստանի ՊՆ-ն ՀՀ-ն անվանել էր պաշտպանական արտադրանքի արտահանման հիմնական ուղղություններից մեկը։
Փետրվարի 11-ին Պապիկյանը հայտարարել էր, որ Հայաստանի ու Հնդկաստանի համատեղ ջանքերն ուղղված են ոչ միայն երկրների պաշտպանունակության բարձրացմանը, այլև միջազգային ու տարածաշրջանային անվտանգության, խաղաղության և կայունության ապահովմանը։
