ՀՀ վարչապետ Նիկոլ Փաշինյանը դիմել է ամուսնացյալ քահանաներին՝ հայտարարելով, թե Կտրիճ Ներսիսյանն (Ամենայն Հայոց կաթողիկոս Գարեգին Բ․ – խմբ․) նույնպես իր եղբայրն է, սակայն կաթողիկոս չէ և պետք է հեռանա Վեհարանից։
Փաշինյանն ավելի վաղ գրառում էր կատարել սոցցանցերում, որտեղ ամուսնացյալ քահանաներին անվանել էր իր եղբայրներ, սակայն որոշ քահանաներ պատասխան հայտարարություններով «վիճարկել էին վարչապետի հետ եղբայրությունը»՝ ստեղծված իրավիճակի ֆոնին։
Վարչապետի խոսքով՝ եթե կաթողիկոսը չհեռանա, ապա հենց քահանաների օգնությամբ եղբայրաբար կհեռացնի նրան։
«Եթե դուք էլ զավակ ունեք, Կտրիճ Ներսիսյանն էլ, ինչո՞ւ եկեղեցում ավելի բարձր կարգավիճակ ունի, քան դուք այն պարագայում, երբ նա խաբում է ժողովրդին ու Աստծուն, իսկ դուք՝ ոչ։ Նա ուխտել է ամուսնանալ եկեղեցու հետ ու դավաճանել է եկեղեցուն, և նրա բարձր կարգավիճակը հիմնված է այդ ուխտի վրա, որը դրժել է»,- դիմել է վարչապետը քահանաներին։
Վարչապետը մայիսի 30-ի առավոտյան մի շարք գրառումներով ոչ հասցեական անդրադարձել էր հոգևորականների՝ իրեն ուղղված քննադատություններին, որոնք հնչել էին մայիսի 29-ի կառավարության նիստի ընթացքում նրա հայտարարությունների ֆոնին, թե «հայկական եկեղեցիները չուլանոց, աղբավայր են դարձրել»։ Ամենայն Հայոց կաթողիկոս Գարեգին Բ-ին փոխարինելու կոչերից և հոգևորականների վերաբերյալ գրառումներից հետո՝ հունիսի 28-ին, Փաշինյանն առաջարկել էր հուլիսի 1-ից հրաժարվել հանրային ոլորտում թշնամական «փողոցային» հռետորաբանությունից:
