Հայաստանի և Ադրբեջանի միջև զինված հակամարտության իրական ռիսկը պահպանվում է, և Միացյալ Նահանգները փորձում է կանխել այն, Սենատում լսումների ժամանակ հայտարարել է ԱՄՆ պետքարտուղար Մարկո Ռուբիոն։
«Մեր հիմնական խնդիրն Ադրբեջանի և Հայաստանի միջև խաղաղության հաստատումն է։ Այնտեղ հակամարտության իրական ռիսկ կա, որը մենք փորձում ենք կանխել»,- ասել է նա։
Ռուբիոյի խոսքով՝ Վաշինգտոնը «փորձում է կանխել զինված միջամտությունը», ինչպես նաև զբաղվում է Ադրբեջանում բանտարկյալների և մարդու իրավունքների պահպանման հետ կապված հարցերով:
«Ճշմարտությունն այն է, որ մենք գործ ունենք երկրների հետ, որոնք շատ դեպքերում չունեն կատարյալ մոդել, բայց մենք պետք է գործենք՝ հիմք ընդունելով մեր ազգային շահերը, պետք է հավասարակշռենք այդ ամենը` մեր ազգային շահն ու դիվանագիտությունը»,- ասել է պետքարտուղարը:
Ադրբեջանը մարտի 13-ին հայտարարել էր Հայաստանի հետ խաղաղության պայմանագրի տեքստի համաձայնեցման մասին։ Երևանն ընդունել էր պայմանագրի երկու չհամաձայնեցված կետի վերաբերյալ առաջարկները՝ միմյանց դեմ միջազգային դատարաններում փոխադարձ հայցերից հրաժարվելու և երրորդ երկրների ներկայացուցիչների ներկայությունը սահմանին չթույլատրելու մասին։ ՀՀ ԱԳՆ-ն նույն օրը հաստատել էր այդ տեղեկատվությունը և հայտնել, որ պատրաստ է քննարկել փաստաթղթի ստորագրման ժամկետը և վայրը։
ՀՀ վարչապետ Նիկոլ Փաշինյանը Մեծ Հայրենական պատերազմում Հաղթանակի 80-ամյակի կապակցությամբ հղած շնորհավորական ուղերձում հայտարարել էր, որ «ի հեճուկս բոլոր սադրանքների»՝ Երևանի և Բաքվի միջև պատերազմ չի լինելու: Նա հիշեցրել էր, որ խաղաղության պայմանագրի նախագիծը համաձայնեցված է և սպասում է ստորագրմանը։
