Հայաստանին վերագրվող սահմանային խախտումների վերաբերյալ Երևանը հետաքննություն է իրականացրել, և տվյալները փոխանցել է Ադրբեջանին, լրագրողներին հայտնել է ԱԽ քարտուղար Արմեն Գրիգորյանը։
Նա մանրամասնել է, որ հայկական կողմը ՀՀ-ին վերագրվող բոլոր միջադեպերի վերաբերյալ հետաքննությունն իրականացրել է Բաքվի փոխանցած տվյալների հիման վրա։ ԱԽ քարտուղարի խոսքով` ընդհանուր առմամբ, ՀՀ-ն իր մասով սահմանային խախտումներ չի արձանագրել։
ԱԽ քարտուղարը, միևնույն ժամանակ, տեղեկացրել է, որ հայկական կողմն Ադրբեջանի խախտումների վերաբերյալ տվյալներ է փոխանցել Բաքվին և մանրամասն հետաքննություն է ակնկալում։
Մայիսի 7-ին հայտնի էր դարձել, որ Ադրբեջանը Հայաստանին հրադադարի ռեժիմի խախտումների մասին տեղեկություններ է փոխանցել: Մայիսի 8-ին ՀՀ ՊՆ-ն հայտնել էր, որ ադրբեջանական կողմը կրակ է բացել Սյունիքի Խնածախ գյուղի ուղղությամբ, ինչի հետևանքով վնասվել էր բնակելի տան տանիքը: Նմանատիպ խախտումներ նաև նախորդ ամիս էին գրանցվել:
Ապրիլի 20-ին Ադրբեջանի ԶՈւ-ի կրակոցների հետևանքով վնասվել էր Սյունիքի Խնածախ գյուղի բնակելի տներից մեկի տանիքում տեղադրված արևային ջրատաքացուցիչը։ Մարտի 31-ին Ադրբեջանի ԶՈւ-ն կրակ էր բացել Խնածախի ուղղությամբ, ինչի հետևանքով վնասվել էր բնակելի տուն։ ՔԿ-ն քրվարույթ էր հարուցել ադրբեջանական զինուժի կրակոցներից հետո։
Բաքուն մարտի 16-ից պարբերաբար հայտարարում է սահմանային իր դիրքերի ուղղությամբ կրակոցների մասին, որոնք հայկական կողմը հերքում է։
