Ազգային ժողովը մարտի 25-ի նիստում երկրորդ ընթերցմամբ և ամբողջությամբ ընդունել է «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը:
Այն ընդունվել է 64 կողմ, 7 դեմ և 0 ձեռնպահ ձայներով։ Ինչպես առաջին ընթեցման քվեարկության դեպքում, այս անգամ էլ «Պատիվ ունեմ» խմբակցությունը դեմ է քվեարկել օրինագծին, «Քաղաքացիական պայմանագրի» պատգամավորները՝ կողմ, «Հայաստան» խմբակցությունը չի մասնակցել քվեարկությանը։
ՀՀ կառավարությունը հունվարի 9-ի նիստում հավանություն էր տվել նախագծին։ ԱԺ-ն փետրվարի 12-ի նիստում առաջին ընթերցմամբ ընդունել էր նախագիծը, որին «Պատիվ ունեմ» խմբակցությունը դեմ էր քվեարկել, իսկ «Հայաստան» խմբակցությունը չէր մասնակցել քվեարկությանը։
ՀՀ վարչապետ Նիկոլ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
Մարտի 24-ին ԱԺ եվրոպական ինտեգրման հարցերի հանձնաժողովը դրական եզրակացություն էր տվել «ԵՄ-ին ՀՀ անդամակցելու գործընթացի մեկնարկի մասին» նախագծին, որտեղ, ի տարբերություն նախնական տարբերակի, չկան «ՀՀ ժողովրդի կամքը» և «խնդիր դնելով Հայաստանը դարձնել անվտանգ, ապահով, զարգացած, բարեկեցիկ երկիր» եզրույթները։
