ԱԺ եվրոպական ինտեգրման հարցերի մշտական հանձնաժողովը մարտի 24-ի նիստում դրական եզրակացություն է տվել Եվրամիությանը Հայաստանի Հանրապետության անդամակցելու գործընթացի մեկնարկի մասին նախագծի խմբագրված տարբերակին։
Նախագծի վերախմբագրված տարբերակը հանձնաժողովը քվեարկությամբ որոշել է ընդգրկել մարտի 25-ին մեկնարկող ԱԺ լիագումար նիստերի օրակարգում։
Ի սկզբանե նախաբանում գրված էր․ «ՀՀ-ն, արտահայտելով ՀՀ ժողովրդի կամքը, խնդիր դնելով Հայաստանը դարձնել անվտանգ, ապահով, զարգացած, բարեկեցիկ երկիր, հայտարարում է․․․»։
«Ժողովրդավարական ուժերի հարթակ» նախաձեռնող խմբի լիազոր ներկայացուցիչ Արտակ Զեյնալյանը տեղեկացրել է, որ վերոնշյալ պարբերությունը վերախմբագրվել է հետևյալ կերպ. «ՀՀ-ն, նպատակ ունենալով զարգացնել ժողովրդավարական ինստիտուտները, բարձրացնել հասարակության բարեկեցությունը, ամրապնդել երկրի անվտանգությունը, դիմակայունությունը և իրավունքի գերակայությունը` հայտարարում է Հայաստանի Հանրապետության` ԵՄ-ին անդամակցելու գործընթացի մեկնարկը»:
Նախագծի վերախմբագրված տարբերակում չկան «ՀՀ ժողովրդի կամքը» և «խնդիր դնելով Հայաստանը դարձնել անվտանգ, ապահով, զարգացած, բարեկեցիկ երկիր» եզրույթները։
ՀՀ կառավարությունը հունվարի 9-ի նիստում հավանություն էր տվել նախագծին։ ԱԺ-ն փետրվարի 12-ի նիստում առաջին ընթերցմամբ ընդունել էր նախագիծը, որին ընդդիմադիր «Պատիվ ունեմ» խմբակցությունը դեմ էր քվեարկել, իսկ «Հայաստան» խմբակցությունը չէր մասնակցել քվեարկությանը։
ՀՀ վարչապետ Նիկոլ Փաշինյանն ընդգծել էր, որ նախագիծը չի նշանակում Հայաստանի անհապաղ անդամակցում ԵՄ-ին, և վերջին խոսքը պետք է հայտնեն քաղաքացիները՝ հանրաքվեի միջոցով։ Նույն օրը Կրեմլից նշել էին, որ Հայաստանը չի կարող միաժամանակ լինել և՛ ԵՄ, և՛ ԵԱՏՄ անդամ։
