Խաղաղության օրակարգը ՀՀ կառավարության առաջնահերթություններից մեկն է, ԱԳՆ-ում Դիվանագիտական ծառայության աշխատակցի օրվան նվիրված միջոցառման ժամանակ հայտարարել է վարչապետ Նիկոլ Փաշինյանը։
«Կարծում եմ, որ մեր տրամադրվածությունը պետք է լինի հետևյալը. եթե մենք դա որդեգրել ենք, նշանակում է դա համապատասխանում է Հայաստանի պետական շահերին, և հետևաբար մենք պետք է լուծենք մեր խնդիրը և դա անենք հենց իմ նշած բանաձևերի արդյունքում՝ աշխարհը, տարածաշրջանը, հարաբերությունները, մարտահրավերները, հնարավորությունները և սպառնալիքներն ավելի լավ և ավելի խորը ճանաչելու միջոցով»,- նշել է Փաշինյանը։
Վարչապետի խոսքով՝ հայկական դիվանագիտության խնդիրն է՝ արտաքին հարաբերությունների հավասարակշռության միջոցով Հայաստանի Հանրապետության շահերի սպասարկումը պահել հավասարակշիռ վիճակում,
Ըստ Փաշինյանի՝ անզեն աչքով էլ նկատելի է, որ նախորդող շրջանը շատ ակտիվ դիվանագիտական տարի էր։ «Մենք հաստատում ենք նոր հարաբերություններ, որոնք նախկինում չենք ունեցել, մենք զարգացնում և ճշգրտում ենք մեր նախկինում ունեցած հարաբերությունները, և սա պետք է դիտարկել բալանսավորված և բալանսավորման արտաքին քաղաքականության համատեքստում: Այդ բալանսավորումների առանցքային պատճառը Հայաստանի Հանրապետության հավասարակշիռ վիճակը պահելու նպատակն ունի։ Այսինքն, մեր խնդիրն է՝ արտաքին հարաբերությունների հավասարակշռության միջոցով Հայաստանի Հանրապետության շահերի սպասարկումը պահել հավասարակշիռ վիճակում»,- նշել է նա:
Իր խոսքում նա ասել է, որ դիվանագիտական ծառայության առաքելությունը Հայաստանի շահերի և ՀՀ համար արտաքին աշխարհում առավել նպաստավոր դիրքեր, իրադրություն ստեղծելն է, որպեսզի ՀՀ ասելիքն առավել հասկանալի և ընդունելի լինի արտաքին աշխարհում: Դրա համար, ըստ նրա, «շատ կարևոր է մանրամասնորեն ճանաչել այն արտաքին միջավայրը, որում գործում ենք»։
Վարչապետի խոսքով՝ հենց արտաքին միջավայրի ընկալումներից և ճանաչումից պիտի կախված լինի, թե ՀՀ-ն ինչը և ինչպես են ներկայացնում, կամ ինչպես են ներկայացնում և ներկայանում որպես անկախ պետություն։
«Շատ պարզ բան. մենք պետք է համոզված լինենք, թե այն, ինչ ճիշտ և արդար ենք համարում, ինչքանով են ճիշտ և արդար համարում արտաքին միջավայրում, որովհետև եթե այս ճանաչողությունը չունենանք, շատ հաճախ զարմացած հայացքների կհանդիպենք և զարմացած հայացքներ կունենանք պարզ իրողություններ և պարզ ճշմարտություններ չհասկանալու փոխադարձ զգացողությունների մեջ»,- նշել է Փաշինյանը։
Հաջորդիվ տեղի է ունեցել դիվանագիտական ծառայության պաշտոնի նշանակված դիվանագետների երդմնակալության արարողությունը, որի շրջանակներում մի շարք դիվանագետներ վարչապետի կողմից ստացել են դիվանագետի վկայականներ:
Արտաքին գործերի նախարար Արարատ Միրզոյանը մի խումբ դիվանագետների պարգևատրել է ՀՀ ԱԳՆ 2-րդ աստիճանի պատվո մեդալով:
Փաշինյանը 2024 թվականի դեկտեմբերի 19-ին խոսել էր Ադրբեջանի հետ խաղաղության պայմանագրի չհամաձայնեցված երկու հոդվածի վերաբերյալ Բաքու ուղարկված Հայաստանի առաջարկների մասին։ Դեկտեմբերի 18-ին Ադրբեջանի նախագահ Իլհամ Ալիևը հայտարարել էր, որ խաղաղության պայմանագրի 17 կետից մնում է համաձայնեցնել 2-ը՝ Միջազգային դատարաններում կողմերի փոխադարձ պահանջներից հրաժարվելու և Հայաստանի ու Ադրբեջանի սահմանին երրորդ երկրների ներկայացուցիչների տեղակայման արգելքի վերաբերյալ։
Փետրվարի 25-ին ՀՀ ԱԳՆ-ն հայտնել էր, որ Երևանն ստացել է խաղաղության պայմանագրի վերաբերյալ Ադրբեջանի պատասխանը, իսկ մյուս ուղղություններով առաջարկները՝ կապուղիների ապաշրջափակում և սպառազինությունների փոխադարձ վերահսկման ու վերիֆիկացիայի մեխանիզմ, դեռ մնում են անպատասխան։ Փետրվարի 26-ին Փաշինյանը հայտարարել էր, որ Հայաստանի և Ադրբեջանի միջև երկաթուղային հաղորդակցությունը վերականգնելու առաջարկին ի պատասխան՝ Երևանը դեռևս սպասում է Բաքվի պաշտոնական արձագանքին։ Նա նաև համոզմունքն էր հայտնել, որ տարածաշրջանում պատերազմի, էսկալացիայի նախադրյալ չկա։
