Դեկտեմբերի 6-ին դատարանը 4 վճիռ է կայացրել հօգուտ Զանգեզուրի պղնձամոլիբդենային գործարանի (ԶՊՄԿ)՝ «Դատաբլոգ» ընկերությանը (Blognews.am կայքի գործարկող) պարտավորեցնելով 2 116 000 դրամ փոխհատուցել զրպարտության և վիրավորանքի համար, հայտնել է Iravaban.net-ը։
Դատարանն արձանագրել է, որ բոլոր 4 գործերի դեպքում պատասխանողը չի ներկայացրել որևէ հավաստի ապացույց, որով կհիմնավորվեր հոդվածներում առկա տվյալների իսկությունը։ Ըստ վճռի՝ դատարանը հաստատված է համարել այն հանգամանքը, որ ներկայացված փաստացի տվյալները իրականությանը չեն համապատասխանում, հայտնել է կայքը։
Ըստ հրապարակման՝ յուրաքանչյուր գործով պատասխանողը պարտավորեցվել է վճարել 300 000 դրամ՝ որպես զրպարտություն տարածելու համար փոխհատուցում, 200 000 դրամ՝ փաստաբանի խելամիտ վարձատրության և 29 000 դրամ պետական տուրքի փոխհատուցման համար։
Կայքը հիշեցրել է, որ ավելի վաղ կոմբինատը մեկական հայցադիմում էր ներկայացրել «Դատաբլոգ»-ի և «Օրագիր Մեդիա» ընկերության կողմից գործարկվող Oragir.News կայքի դեմ կոմբինատի պատիվը, արժանապատվությունը և բարի համբավը արատավորող նյութեր հրապարակվելու համար, որոնք նույնպես հաղթել էր դատարանում։
